އިންގްލިޝް ޕްރިމިއަރ ލީގުގައި ހޮނިހިރު ދުވަހު، ލީގުގެ އެއްވަނައިގައި އޮތް މެންޗެސްޓަރ ސިޓީ އާއި ދެވަނައިގައި އޮތް ލިވަޕޫލް ބައްދަލުކުރި މެޗު 1-1 އެއްވަރު ވެއްޖެއެވެ. އަދި ސިޓީގެ އިތިހާދު ސްޓޭޑިއަމްގައި ކުޅުނު މި މެޖުގައި އެ ޓީމަށް ހާލަންޑު ކާމިޔާބު ކޮށްދިން ގޯލާއެކީ، އޭނާ ވެގެން ގޮސްފައިމިވަނީ ލީގުގައި އެންމެ އަވަހަށް 50 ގޯލު ކާމިޔާބުކުރި ކުޅުންތެރިޔާއަށެވެ.

މިދިޔަ އަހަރުގެ ޖޫންގައި ޖަރުމަހްގެ ބްރޫޝިއާ ޑޯޓްމަންޑުން ސިޓީއަށް ބަދަލުވި ހާލަންޑު، ޕްރިމިއަރ ލީގުގެ މި ރެކޯޑު މި އައުކުރީ 48 މެޗުންނެވެ. ކުރިން މި ރެކޯޑު އޮތީ މެންޗެސްޓަރ ޔުނައިޓެޑަށާއި ނިއުކާސްލް ޔުނައިޓެޑަށް ކުޅުނު އެންޑްރޫ ކޯލްގެ އަތުގައެވެ. އޭނާ 50 ގޯލު ކާމިޔާބުކުރީ 65 މެޗުންނެވެ. އެއީ ހާލަންޑަށް ވުރެން އިތުރަށް 17 މެޗު ކުޅެގެނެވެ.

ލިވަޕޫލުން ސިޓީއާ ދެކޮޅަށް ރަށުން ބޭރުގައި ނިކުތް އިރު، ސިޓީ ބަލިކޮށް ލީގު އެއްވަނައަށް ކުރިޔަށް ޖެހިލުމުގެ ފުރުސަތު އެޓީމަށް އޮތެވެ. ނަމަވެސް މެޗުގެ 27 ވަނަ މިނެޓުގައި ހާލަންޑު ޖެހި ގޯލާއެކީ، މެޗުން މޮޅުވުމުގެ ފުރުސަތު ލިވަޕޫލަށް ހަނިވެގެން ދިޔަ ނަމަވެސް، އަލެކްސެންޑަރ އާނޯލްޑް މެޗުގެ 80 ވަނަ މިނެޓުގައި ޖެހި ރީތި ގޯލުން، ސިޓީއަށް ލީގު އެއްވަނައިގައި ލީޑު ފުޅާ ކުރުމުގެ ފުރުސަތު ގެއްލުވާލެވުނެވެ. 

Advertisement