ވެރިކަން ކުރާ ޕާޓީ، ޕީއެންސީ އެކްސްގައި ފޮލޯ ކުރާ މީހުންނަށް ވުރެ ގިނަ މީހުން، ރައީސް ޔާމީން އުފައްދަވާ އައު ޕާޓީއަށް ދެގަޑިއިރުގެ ތެރޭގައި ފޮލޯކޮށްފިއެވެ.

ރައީސް ޔާމީން އުފައްދަވާ އައު ޕާޓީ، ޕީޕަލްސް ނެޝަނަލް ފްރޮންޓްގެ ރަސްމީ ސޯޝަލްމީޑިއާ އެކައުންޓްތައް ހާމަކުރީ، މިރޭ 9:30 ގައެވެ. އެކްސްގައި، އެޕާޓީގެ އެކައުންޓް ހެދިތާ 2 ގަޑިއިރުގެ ތެރޭގައި ވަނީ، 2000 އެއްހައި މީހުން އެ އެކައުންޓް ފޮލޯކޮށްފައެވެ. ސަރުކާރު ހިންގާ ޕާޓީ ޕީއެންސީގެ އެކްސް އެކައުންޓް ހެދިތާ ގިނަ ދުވަސްތަކެއް ވެފައި ވާއިރު، އެ އެކައުންޓް ފޮލޯ ކުރާ ތިބީ އަދި، 1368 މީހުންނެވެ.

ރާއްޖޭގައި ސިޔާސީ ގޮތުން އެންމެ މަޤުބޫލު ސޯޝަލްމީޑިއާ ޕްލެޓްފޯމަކީ، އެކްސްއެވެ. 

ރައީސް ޔާމީނު ޕީޕީއެމް ދޫކުރައްވައި އައު ޕާޓީއެއް ހައްދަވާނެކަން އިޢުލާނު ކުރެއްވުމާއި އެކު އަދި ކިރިޔާ ހަފްތާއެއްވީ، ރައީސުލްޖުމްހޫރިއްޔާ، ޑރ. މުހައްމަދު މުޢިއްޒުގެ ސަރުކާރު ވަނީ ޕްރެޝަރަށް ވެއްޓިފައެވެ.

ސިޔާސީ ދާއިރާގެ ތަޖުރިބާކާރުން ވިދާޅުވާ ގޮތުގައި، ރައީސް ޔާމީނު، ޑރ. މުޙައްމަދު މުއިއްޒުގެ ވެރިކަމުގެ މިހާ ކުރީކޮޅު ސަރުކާރާއި ފެއަށް ޖެހިވަޑައިގަތުމަކީ، ވެރިކަން ހިފެހެއްޓުމަށް، ޑރ. މުޙައްމަދު މުޢިއްޒުއަށް ކުރިމަތިވެވަޑައިގަންނަވާނެ ވަރަށްބޮޑު ގޮންޖެހުމަކަށް ވާނެއެވެ. އަދި ރައީސް ޑރ. މުހައްމަދު މުޢިއްޒަށް ވުރެ އާއްމުންގެ މެދުގައި ރައީސް ޔާމީނު މާބޮޑަށްވެސް މަޤުބޫލުވާނެކަމަށާއި، އެކަން މިހާރުވެސް ހާމަވަމުންދާކަމުގައި ސިޔާސީ ދާއިރާގެ ތަޖުރިބާކާރުން ގެންދަނީ ވިދާޅުވަމުންނެވެ.