ރައީސް ޔާމީނު އިސްވެ ހުންނަވައިގެން އުފައްދާ އައު ސިޔާސީ ޕާޓީގެ ނަމަކީ، ޕީޕަލްސް ނޭޝަނަލް ފްރޮންޓް(ޕީއެން ފްރޮންޓް)ކަމުގައި ހަމަޖައްސައި އެކަން އާއްމުކޮށްފިއެވެ.

ރައީސް ޔާމީން އުފައްދަވާ މިއައު ޕާޓީގެ ސޯޝަލްމީޑިއާ އެކައުންޓްތައް މިރޭ ވަނީ ތަޢާރަފްކޮށްފައެވެ. 

ރައީސް ޔާމީނުގެ ފަރާތްޕުޅުން މި އައު ޕާޓީ އުފެއްދެވުމުގައި އިސްކޮށް ހަރަކާތްތެރިވެވަޑައިގަންނަވަނީ، އެމަނިކުފާނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ، ޑރ. މުޙައްމަދު ޖަމީލު އަޙުމަދާއި، މުޙައްމަދު މަލީޙް ޖަމާލެވެ.

ރައީސް ޔާމީން އުފައްދަވާ މިއައު ޕާޓީ އުފެއްދުމުގެ ހުއްދައަށް އެދި މާދަމާ އިލެކްޝަންސް ކޮމިޝަނަށް ހުށައަޅާނެ ކަމުގައި މައުލޫމާތު ލިބިފައިވެއެވެ. އެހެން ނަމަވެސް ސީދާ ރައީސް ޔާމީނުގެ ނަމުގައި މިޕާޓީވެސް އުފެއްދުމަށް ހުށަނޭޅޭތީ، އައުޕާޓީވެސް އުފައްދާނީ އެހެން ބޭފުޅުންތަކެއް ރައީސް ޔާމީނު ކުރިޔަށް ނެރުއްވައިގެން ކަމަށް ވަނީ ބެެލެވިފައެވެ.

ރައީސް ޔާމީނު ޕީޕީއެމްއިން ވަކިވެވަޑައިގެން އައު ސިޔާސީ ޕާޓީއެއް އުފެއްދުމަށް ނިންމެވީ، އެމަނިކުފާނުގެ ފޮޓޯފުޅާއި ނަން އަދި އެމަނިކުފާނުގެ ސަޕޯޓަރުންގެ ވޯޓު ހޯދައިގެން ރައީސުލްޖުމްހޫރިއްޔާގެ މަޤާމަށް، ޑރ. މުހައްމަދު މުޢިއްޒު ވަޑައިގެން ވެރިކަމުގެ ހުވާ ކުރެއްވިތާ 7 ދުވަސްވެސް ނުވަނީހެވެ.