ރައީސް ޑރ. މުޢިއްޒާއި ދެކޮޅު ވުމަކީ ރައީސް ޔާމީނުގެ ތާޢީދު ގެއްލޭނެ ކަމެއްކަމަށް ބުނެ ސަރުކާރު ހިންގާޕާޓީ ޕީޕީއެމްއިން ރައީސް ޔާމީނަށް ފާޑު ކިޔައިފިއެވެ.

ރައީސް ޔާމީން އިސްނެންގެވުމަށް އުފެއްދެވި ޕާޓީ، ޕީއެންސީ ރާއްޖޭގެ ވެރިކަމަށް އައީ ރައީސް ޔާމީނުގެ ތާއީދާއި މަދަދާއި، އެމަނިކުފާނަށް ތާޢީދުކުރާ އެތައްހާސް ބައެއްގެ ވޯޓުންނެވެ. އެހެން ނަމަވެސް ވެރިކަމުގެ ފުރަތަމަ ހަފްތާ ނުނިމެނީސް ރައީސް ޔާމީން ޕީޕިއެމްއިން ވަކިވެވަޑައިގެން ސަރުކާރާއި ވަނީ ފެއަށް ޖެހިވަޑައިގެންފައެވެެ. ރައީސް ޔާމީނާއި ޑރ. މުޢިއްޒާއި ދެމެދު އުފެދިފައިވާ ނުތަނަވަސްކަމުގެ ހުޅު ފަޅައިގެން ދިޔައިރު، ރިޔާސީ އިންތިޚާބުގައި ރައީސް ޔާމީނުގެ ފޮޓޯފުޅު ހިފައިގެން ކެމްޕޭން ކުރި ފަރާތްތަކުން މިހާރު ވަނީ ސަރުކާރުގެ މަޤާމުތައް ލިބުމާއި އެކު ރައީސް ޔާމީނަށް ފާޑުކިޔަން ފަށާފައެވެ.

ޕީއެންސީން އެޕާޓީގެ ފޭސްބުކް ޕޭޖުގައި ކޮށްފައިވާ ޕޯސްޓުގައި ބުނެފައި ވަނީ، މަލީހް އާ ޑރ. ޖަމީލްގެ އަވައިގައި ޖެހި ރައީސް ޑރ މުއިއްޒު އާއި ދެކޮޅުވުމަކީ ރައީސް ޔާމީނަށް ރައްޔިތުންގެ ހިތުގައިވާ ލޯބި ގެއްލިދާނެ ކަމެއް ކަމަށެވެ. 

އެޕޯސްޓުގައި ރައީސް ޑރ. މުޙައްމަދު މުޢިއްޒު ދިފާޢުކޮށް ބުނެފައި ވަނީ، ޑރ. މުޢިއްޒަކީ، ޕާޓީ ކޮޅަށް ޖެހި މޭސްތިރި ކަމަށާއި، އަދި ރައީސް ޔާމީނު ޖަލުން ސަލާމަތް ކުރުމަށްވެސް އެންމެ ބޮޑަށް މަސައްކަތް ކުރެއްވި ބޭފުޅާ ކަމަށެވެ.

ޑރ، މުޙައްމަދު މުއިއްޒު ރައިސުލްޖުމްހޫރިއްޔާކަމުގެ މަޤާމަށް ވަޑައިގެންނެވީ، ވެރިކަމުގެ ފުރަތަމަ ދުވަހުގައި ރައީސް ޔާމީން މިނިވަން ކުރެއްވުމުގެ ވަޢުދާއި އެކުގައެވެ. އެހެން ނަމަވެސް ވެރިކަމުގެ ފުރަތަމަ ހަފްތާ ނިމިގެން ދިޔައިރުވެސް ރައީސް ޔާމީން މިނިވަންވެފައި ނުވާތީ ރައީސް ޔާމީނަށް ތާޢީދުކުރާ ފަރާތްތަކުން ދަނީ ޑރ. މުއިއްޒަށާއި ސަރުކާރަށް ފާޑުކިޔަމުންނެވެ.