އެމް. ޑަބްލިޔު.އެސް.ސީ. ދިވެހި ޕްރިމިއަރ ލީގުގައި ބުރާސްފަތި ދުވަހުގެ ރޭ އީގަލްސް އާއި ސުޕަ ޔުނައިޓެޑް ސްޕޯޓްސް (ސަސް) ބައްދަލުކުރި މެޗު 5-2 އިން ކާމިޔާބުކޮށް، އީގަލްސް އިން ލީގު ކާމިޔާބު ކުރުމުގެ އުއްމީދު އައުކޮށްފިއެވެ.

މި ވަގުތު ލީގުގެ އެއް ވަނައިގައި އީގަލްސް އޮތީ 13 މެޗުން 35 ޕޮއިންޓު ހޯދައިގެނެވެ. ދެ ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން ކްލަބަށް 11 މެޗުން 31 ޕޮއިންޓު ލިބިފައި ވީ ނަމަވެސް، ކުރިޔަށް އޮތް 2 މެޗު ކާމިޔާބުކޮށްފިނަމަ، 37 ޕޮއިންޓާއެކު އެ ޓީމުން އެއް ވަނައަށް އަރާނެއެވެ. ލީގު ކާމިޔާބު ކުރުމަށް އީގަލްސް އޭރުން ޖެހޭނީ ފަހު މެޗުގައި މާޒިޔާ ބަލިކުރާށެވެ. 

އީގަލްސް އިން ސަސްއާ ދެކޮޅަށް ކުޅުނު މެޗުގައި، މި ވަގުތު ރަނގަޅު ފޯމެއްގައި ހުރި އެ ޓީމުގެ ކެޕްޓަން، އަހުމަދު ރިޒުވާން (ރިޒޭ) ވަނީ 3 ގޯލު ކާމިޔާބުކޮށް ހެޓްރިކެއް ހަދާފައެވެ. ބާކީ ގޯލުތައް އެ ޓީމަށް ކާމިޔާބުކޮށްދިނީ ޒައިން ޒަފަރުއާ، އެ ޓީމުގެ ބިދޭސީ ކުޅުންތެރިޔާ، މިލާން ޕެޓްކޮވިޗްއެވެ..

ސަސްގެ ގޯލުތައް ކާމިޔާބުކޮށްދިނީ އިބްރާހިމް އަތީގް ހަސަން (އިއްބެ) އާއި އަލީ ނަސޫހު ރަޝީދު (ޕިލާ)އެވެ. މި ނަތީޖާއާއެކު 13 މެޗުން ސަސްއަށް ލިބިފައިމިވަނީ 27 ޕޮއިންޓެވެ.

ލީގުގެ މެޗެއް ދެން އޮންނާނީ މި މަހު 30 ގައެވެ. ބައްދަލުކުރާނީ ސަސް އާއި ޓީސީ ސްޕޯޓްސް ކްލަބެއެވެ. އެއީ މި ސީޒަންގައި ސަސް ކުޅޭ ލީގުގެ ފަހު މެޗެވެ.