މިހާރު ކުރިޔަށްދާ، އެމް. ޑަބްލިޔު.އެސް.ސީ. ދިވެހި ޕްރިމިއަރ ލީގުގެ ތިން ވަނަ ބުރެއް ނުކުޅޭން، ފުޓްބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) އިން ނިންމައިފިއެވެ. މައުލޫމާތު ލިބިފައިވާ ގޮތުން، އެފްއޭއެމް އިން މިގޮތަށް ނިންމާފައިވަނީ މި މަހުގެ 7 ވަނަ ދުވަހު ބޭއްވި އެފްއޭއެމްގެ އެކްޒެކެޓިވް ކޮމެޓީގައި، ކްލަބް ތަކާ މަޝްވަރާ ކުރުމަށްފަހުއެވެ. 

އެފްއޭއެމް އިން މިހެން ނިންމީ، މާލީ ހާލަތާ ހުރެ ލީގުގެ ދެ ޓީމެއް، ލީގުގެ ބާކީބައި ނުކުޅެއް ނިންމާފައިވަނިކޮށެވެ. އެއީ ކްލަބް ވެލެންސިއާ އާއި ކްލަބް ގްރީން ސްޓްރީޓެވެ.

މި ނިންމުމާއެކީ ކޮންމެ ކްލަބަކުން ވެސް ލީގުގައި ޖުމްލަ ކުޅޭނީ 14 މެޗެވެ. ނަމަވެސް އާންމު ގޮތެއްގައި ލީގުގެ ތިން ބުރު ކުޅޭއިރު ކޮންމެ ކްލަބަކުން ޖުމްލަ 21 މެޗު ކުޅެއެވެ.

ލީގުގެ ތާވަލަށް މިވަގުތުތ ބަލާއިރު، އެއް ވަނައިގައި އީގަލްސް އޮތީ ކްލަބް އީގަލްސްއެވެ. އެއީ 12 މެޗުން 32 ޕޮއިންޓު ހޯދައިގެނެވެ. ދެ ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ވަނީ 11 މެޗުން 31 ޕޮއިންޓް ލިބިފައެވެ. އަދި ތިން ވަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް) އަށް 12 މެޗުން ލިބިފައިވަނީ 27 ޕޮއިންޓެވެ.