އިންޑިއާއިން ރާއްޖެއަށް ކަނޑައަޅުއްވާފައިވާ ސަފީރު، މުނޫ މުހާވަރު، ރާއްޖޭގެ ފޮރިން މިނިސްޓަރ މޫސާ ޒަމީރާއި ބައްދަލުކުރައްވައިފިއެވެ.

މިބައްދަލުކުރެއްވުން ކުރިޔަށް ދިޔައީ މިއަދު ފޮރިން މިނިސްޓްރީގައެވެ.

މިބައްދަލުވުމާއި ގުޅޭ ގޮތުން، އިންޑިއާ ސަފީރު ކުރެއްވި ޕޯސްޓެއްގައި ވިދާޅުވީ، އިންޑިޔާއާއި ރާއްޖޭގެ ގުޅުން އިތުރަށް ބަދަހިކުރުމާ ގުޅޭގޮތުން، އެބައްދަލުވުުމުގައި ވަރަށް އުފެއްދުންތެރި މަޝްވަރާތަކެއް ކުރެވުނު ކަމަށެވެ. އެހެން ނަމަވެސް އެ މަޝްވަރާތަކާއު ގުޅޭ އިތުރު ތަފްސީލެއް އެމަނިކުފާނުވެސް އަދި އިންޑިއާ އެމްބަސީންވެސް ހާމަކުރައްވާފައެއް ނުވެއެވެ. މީގެ އިތުރުން މިބައްދަލުވުމާއި ގުޅޭ ގޮތުން ފޮރިން މިނިސްޓްރީންވެސް އެއްވެސް އެއްޗެއް ބުނެފައެއް ނުވެއެވެ.

މިސަރުކާރު ވެރިކަމަށް އައީ، އިންޑިއާ އާއި ރާއްޖޭގެ ގުޅުން ކިލަނބުވާފަދަ ހަޤީޤަތެއްނެތް އެތައް ވާހަކަތަކެއް ފަތުރައިގެންނެވެ. މިގޮތުން އިންޑިއާ ސިފައިން ރާއްޖޭގައި ހަތިޔާރާއިއެކު ޤާއިމްވެ ތިބޭކަމަށް ތުހުމަތުކޮށް، ރާއްޖެއިން އިންޑިއާ ސިފައިން ފޮނުވާލުމަކީ، ސަރުކާރުގެ މައިގަނޑު އެއް ވަޢުދުކަމުގައި ހައްދަވާފައިވެއެވެ.