ޕީއެންސީއަށް ވަކި އޮފީހެއް ގާއިމުކޮށް ޕާޓީއަށް 10،000 މެންބަރުން ހަމަ ކުރުމުގެ މަސައްކަތް ފަށައިފިއެވެ.

ޕްރޮގުރެސިވް ކޯލިޝަނަށް ނިސްބަތްވާ ޕީއެންސީގެ މަސައްކަތްތައް މީގެ ކުރިން ކުރަމުންދިޔައީ ހ. ހުރަފާގައި ހުންނަ ޕީޕީއެމްގެ އޮފީހުގައެވެ. ނަމަވެސް ވެރިކަމަށް އައުމަށްފަހު ޕީއެންސީގެ މަސައްކަތްތައް ވަކި އޮފީހަކަށް މިހާރު ވަނީ ބަދަލުކޮށްފައެވެ. ޕީއެންސީގެ އޮފީސް ގާއިމުކޮށްފައި ވަނީ ކެމްޕޭނު ދުވަސްވަރު ކާނިވަލުގައި ދިވެހީންގެ ޖަގަހަ ހިންގަމުން އައި ތަނުގައެވެ.

ވަކި އޮފީހެއް ހަދައި މެމްބަރުން އިތުރުކުރުމުގެ މަސައްކަތް ކުރަނީ ޕީއެންސީއަށް 10،000 މެމްބަރުން ހަމަކުރަން ރައީސް ޑރ.މުހައްމަދު މުއިއްޒު އެދިވަޑައިފެންފައި ވާތީކަމަށް މައުލޫމާތުލިބެއެވެ. އިލެކްޝަންސް ކޮމިޝަންގެ ޕާޓީތަކުގެ ދަފުތަރުގައިވާ ގޮތުން މިދިޔަ ފެބްރުއަރީ 21 އާ ހަމައަށް ޕީއެންސީގައި މެންބަރުންގެ ގޮތުގައި ތިބީ 3,159 މެންބަރުންނެވެ.

ކުރިއަށް އޮތް މަޖިލިސް އިންތިހާބުގެ ޕްރައިމަރީއަށް މެންބަރުން އިތުރު ކުރުމުގެ މަސައްކަތް ޕީއެންސީއާއި ޕީޕީއެމުން ވެެސް ދަނީ ކުރަމުންނެވެ. ވެރިކަމަށް ވަޑައިގެންނެވުމުން ޕީއެންސީ އޭގެ ޒާތުގައި ބޮޑު ޕާޓީއަކަށް ވާނެ ކަމަށް ވެސް ކެމްޕޭނު ތެރޭގައި ރައީސް ޑރ. މުހައްމަދު މުއިއްޒު ވިދާޅުވެފައިވެއެވެ.

ޖަލު ހުކުމަށް ލުއި ލިބިވަޑައިގަތުމުން ރައީސް އަބްދުﷲ ޔާމީން ޕީޕީއެމް އޮފީހަށް ވަޑައިގެން، ސަޕޯޓަރުންނާ ބައްދަލު ކުރައްވައި ވަނީ ޕީޕީއެމްގެ އެއްވެސް މެންބަރަކު، ޕީއެންސީއަށް ބަދަލު ވާން ނުޖެހޭ ކަމަށް ވިދާޅުވެފައެވެ.