އެސްޓީއޯއިން ވިއްކާ ހިޓާޗީ ފްރިޖްތަކަށް ކަރަންޓު ބޭނުންވާ މިންވަރު އަނގައިދޭ "ހަކަތަރި" ލޭބަލް ޖަހަން ފަށައިފިއެވެ. އެގޮތުން އެސްޓީއޯއިން  މިހާރުވަނީ އެ ކުންފުނިން ވިއްކާ ހިޓާޗީ ފްރިޖްގެ 14 މޮޑެލްއެއްގައި ހަކަތަރީގެ ލޭބަލް ޖަހާފައެވެ.

އެސްޓީއޯއިން ހަކަތަރީގެ ލޭބަލް ބޭނުންކުރަން ފަށާފައިވާ 14 މޮޑެލްގެ ތެރޭގައި ތިން ތަރި އަދި ހަތަރު ތަރީގެ ލޭބަލް ހިމެނެއެވެ. ހަކަތަރި ލޭބަލް ހުންނާނީ އެކަކުން ފެށިގެން ފަހަކާއި ހަމައަށް ދަރަޖަ ގިންތި ކުރެވިފައެވެ. ލޭބަލްގައި ޖަހާފައިވާ ނަންބަރު 1 އެއީ، ވަސީލަތް ހިންގުމަށް އެންމެ ގިނައިން ކަރަންޓު ބޭނުންވާ ޕްރޮޑަކްޓްތަކެވެ. އަދި ލޭބަލްގެ ނަންބަރު މަތިވާ ވަރަކަށް އަންގައިދެނީ، ހިންގުމަށް ކަރަންޓު ބޭނުންކުރާ މިންވަރު މަދުކަމެވެ.

"ހަކަތަރި" ލޭބަލް ހަރުކޮށްފައިވާ ފްރިޖެއް

ދިރިއުޅުމަށް އައި ބަދަލުތަކާއެކީ ގޭބިސީ ތަކުގައި ކަރަންޓު ބޭނުންކުރާ މިންވަރު އައީ ދުވަހެއް ދުވަހަކަށް އިތުރުވަމުންނެވެ. މި ސަބަބާހުރެ، "ހަކަތަރި" ލޭބަލް ޖެހުމަކީ ކަރަންޓަށް ކުރާ ހޭދަ ކުޑަކުރުމަށް ބާރު އަޅާ، އެންވަޔަރަމަންޓް މިނިސްޓްރީން ފަށާފައިވާ މަސައްކަތެކެވެ. އެގޮތުން ހަކަތަ ސަމަކާރަ ޕްރޮގްރާމްގެ އެންމެ ބޮޑު މަޤުޞަދަކީ ރާއްޖޭގައި ކަރަންޓު ޚަރަދު ކުޑަ ވަސީލަތްތައް ބޭނުންކުރުމަށް އަހުލުވެރި ކުރުމާއި ކަރަންޓަށް ކުރާ ހޭދަ ކުޑަކޮށް ތިމާވެއްޓާ ރައްޓެހި ގޮތްތައް އަށަގެންނެވުމެވެ.

ފްރިޖުގެ އިތުރުން، އެސްޓީއޯއިން ވަނީ އެ ކުންފުނިން ވިއްކާ 6 މޮޑެލެއްގެ އޭސީގައި ވެސް ދިވެހިން ލިޔެފައިވާ ކަރަންޓު ބޭނުންވާ މިންވަރު އަންގައިދޭ ލޭބަލް، މެއި 2022 ފެށިގެން ބޭނުންކުރަން ފަށާފައެވެ. އަދި އެ ކުންފުނިން ވިއްކާ ލޭބަލް ޖެހި އޭ.ސީގެ ތެރޭގައި އާއްމު އޭސީތަކަށްވުރެ %42 މަދުން ކަރަންޓު ބޭނުންކުރާ އޭސީތައް ހިމެނެއެވެ.