ގަލޮޅު ދަނޑުގައި އާދިއްތަ ދުވަހުގެ ރޭ މާޒިޔާ ސްޕޯޓްސް އެންޑް ރެކްރިއޭޝަނާއި ޔުނައިޓެޑް ވިކްޓްރީ (ޔޫވީ) ބައްދަލުކުރި މެޗު ބޮޑު ތަފާތަކުން މާޒިޔާ ކާމިޔާބު ކޮށްފިއެވެ. މި މެޗު 11-0 ކާމިޔާބުކޮށް މާޒިޔާއިން ވަނީ ލީގުގައި މިހާރު ޖުމްލަ 25 ޕޮއިންޓު ހޯދާފައެވެ.

ފުރަތަމަ ހާފުގައި މާޒިޔާއިން ވަނީ 6 ގޯލު ކާމިޔާބުކޮށްފައެވެ. މީގެ ތެރޭގައި ވޮޖިސްލާވް ބަލަބަނޮވިޗް ކާމިޔާބުކުރި ހެޓްރިކް ހިމެނެއެވެ. އޭނާގެ އިތުރުން ފުރަތަމަ ހާފުގައި ގޯލްތައް ކާމިޔާބުކުރީ ޓޮމާކީ ވަޑާއާއި ހަސަން ރާއިފް އަޙްމަދު (ހަންނަ) އަދި ނާއިޒް ހަސަން (ދާދު) އެވެ.

މާޒިޔާގެ 7 ވަނަ ގޯލަކީ ޔޫވީގެ ކީޕަރު އިބްރާޙިމް ފައިރޫޝް އަތުން ބައިކޮޅަށް ވަތް ގޯލެކެވެ. އަދި އެ ގޯލުގެ ފަހުން، އަނިޔާވެ ފައިރޫޝް ބަދަލު ކުރަން ޖެހުން ވެގެން ދިޔައީ ޔޫވީއަށް ލިބުނު އިތުރު ގެއްލުމަކަށެވެ.

މާޒިޔާއިން ދެން ކާމިޔާބު ކުރި 4 ގޯލަކީ ވެސް ފަހު ހާފުގައި ކުޅެން ނިކުތް ހަމްޒާ މުޙައްމަދު (ހަމްޕު) ކާމިޔާބުކުރި 4 ގޯލެވެ. މީގެ ތެރެއިން 2 ގޯލު އޭނާ ކާމިޔާބުކުރީ މެޗުގެ އިތުރު ވަގުތުގައެވެ.

ދިވެހި ލީގުގައި އާދިއްތަ ދުވަހުގެ ހަވީރު ކުޅުނު މެޗުގައި އީގަލްސް އިން ވަނީ ޓީސީ ސްޕޯޓްސް ކްލަބް 2-1 އިން ބަލިކޮށްފައެވެ. މެޗުގައި އީގަލްސް އިން ލީޑު ނެގީ ފުރަތަމަ ހާފުގައި އިބްރާޙިމް މަހުދީ ޙުސެއިން (ފޭދޫ އިއްބެ) ޖެހި ގޯލަކުންނެވެ. ޓީސީއިން މެޗުގެ ނަތީޖާ ހަމަހަމަކުރީ ޒަޔާން ނަސީރު 54 ވަނަ މިނެޓުގައި ކާމިޔާބުކުރި ގޮލަކުންނެވެ. އަދި އީގަލްސް އިން ދެވަނަ ފަހަރަށް ލީޑު ނެގީ 67 ވަނަ މިނެޓުގައި އަޙުމަދު ރިޒުވާން (ރިޒޭ) ކާމިޔާބުކުރި ގޯލަކުންނެވެ.

މި ނަތީޖާތަކާ އެކީ އީގަލްސް އިން ލީގުގެ އެއްވަނައިގައި އޮތީ މާޒިޔާއަށް ވުރެން 2 މެޗު އިތުރަށް ކުޅެ 29 ޕޮއިންޓު ހޯދައިގެންނެވެ. އަދި މާޒިޔާއަށް މިހާރު ލިބިފައިވަނީ 9 މެޗުން 25 ޕޮއިންޓެވެ.

ދިވެހި ޕްރިމިއާ ލީގުގައި މިއަދު ހަވީރު ކުޅޭ މެޗުގައި ވާދަކުރަން ހަމަޖެހިފައި އޮތީ ބުރު ސްޕޯޓްސް ކުލަބާއި ކުލަބު ގްރީން ސްޓްރީޓްސްއެވެ.