މިއަދު ހަވީރު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ އަލްއުސްތާޛު މުޙައްމަދު ފިރުޒުލް ޢަބްދުﷲ ޚަލީލް ރާއްޖޭގައި ތިބި ސިފައިންގެ އަދަދު ހާމަކުރައްވައިފިއެވެ. އެގޮތުން ފިރުޒުލް ހާމަކުރެއްވި ގޮތުގައި ރާއްޖޭގައި ގާއިމްވެތިބީ އިންޑިއާގެ 77 ސިފައިންގެ މީހުންނެވެ.

ފިރުޒުލް އިތުރަށް ވިދާޅުވި ގޮތުގައި މި ސިފައިންގެ މީހުންގެ ތެރެއިން، 24 ސިފައިންގެ މީހަކު އެއް ހެލިކޮޕްޓަރު ދުއްވަން ތިބިއިރު، އަނެއް ހެލިކޮޕްޓަރު ދުއްވަން ތިބީ 26 ސިފައިންނެވެ. އަދި ޑޯނިއާ މަތިންދާބޯޓު ދުއްވަން 25 ސިފައިންނެވެ. މީގެ އިތުރުން މެއިންޓެނަންސްއާއި އިންޖިނިއަރިންގެ މަސައްކަތުގައި ހަރަކާތްތެރިވާ އިންޑިއާ ސިފައިންގެ 2 މީހެކު ތިބިކަމަށް ހާމަކުރެއްވިއެވެ.

އަދި މިހާތަނަށް ސަރުކާރުން ކުރެއްވި މަސައްކަތުން ފާހަގަވި ކަންކަމުގެ ތެރޭގައި، ވޭތުވެދިޔަ 5 އަހަރުގެ ތެރޭގައި އިންޑިއާއާއެކު ޖުމްލަ 100 އަށްވުރެ ގިނަ ބައިލެޓްރަލް އެއްބަސްވުމުގައި ސޮއިކޮށްފައިވާކަން ފާހަގަވެފައިވާކަމުގައިވެސް އަންޑަރ ސެކްރެޓެރީ ފޮރ ޕަބްލިކް ޕޮލިސީ ވިދާޅުވިއެވެ.

Advertisement

މި ސަރުކާރުން ރިޔާސީ އިންތިހާބަށް ކެމްޕެއިންކުރެއްވިއިރު އެންމެ ބޮޑަށް ދެއްކެވި ވާހަކައަކީ އިންޑިއާ ސިފައިން ގިނަ ބަޔަކު ރާއްޖޭގައި ތިބި ކަމަށާއި، ރާއްޖޭގެ މިނިވަންކަން ކަށަވަރު ކުރުމަށް އެމީހުން ރާއްޖެއިން ފައިބަންޖެހޭނެކަމުގެ ވާހަކައެވެ. އެކަމަށް އަލިއަޅުވާލާ މިއަދުގެ ނޫސްވެރިންގެ ބައްދަލުވުމުގައި ވިދާޅުވީ، ޤައުމެއްގެ ސިފައިން ރާއްޖޭގައި ޤާއިމުވެ ތިބުމަށް ދިވެހި ރައްޔިތުން ބޭނުންނުވާކަމަށާއި، ރާއްޖޭގެ ސިޔާދަތަށް އުނިކަން ލިބޭގޮތަށް ދޭދޭ ޤައުމުތަކާއެކު ވެފައިވާ އެއްބަސްވުންތަކުގައި ހުރި ނުކުތާތައް ސަރުކާރުން އުވާލާނެ ކަމަށެވެ.