ރާއްޖެއަށް ދެމެހެއްޓެނިވި ޢަދުލުވެރި ތަރައްޤީގެ ނިޒާމެއް ބޭނުންވާކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ދިވެހި ޒަޢާމަތާ ހަވާލުވެވަޑައިގެން، ޤައުމާ މުޚާޠަބު ކުރައްވައި ދެއްވި ފުރަތަމަ ތަޤުރީރުގައެވެ.

ރައީސުލްޖުމްހޫރިއްޔާ ވިދާޅުވީ، އެމަނިކުފާނު ދެކެވަޑައިގަންނަވާ ގޮތުގައި، ރާއްޖެއަށް ދެމެހެއްޓެނިވި ޢަދުލުވެރި ތަރައްޤީގެ ނިޒާމެއް ބޭނުންވާ ކަމަށާއި، މި ފަށާ އާ ސަރުކާރުން ތަރައްޤީގެ ހަރަކާތްތައް ކުރިއަށް ގެންދާނީ އެ ވިސްނުމުގެ ތެރެއިންކަމަށެވެ.

މިގޮތުން، ސަރަހައްދީ ތަރައްޤީ ނުވަތަ ރާއްޖޭގެ އެކި ސަރަހައްދުތަކަށް ތަރައްޤީއާއި ރަށްވެހިކަމުގެ މަންފާ ބެހެވިގެންދާ ގޮތަށް އެކަށައެޅޭ ޒަމާނީ މަފުހޫމެއްގެ ތެރެއިން، އެކަމަށްޓަކައި މެދުރާސްތާގެ އަމާޒުތަކަކާއި، ދުރު ރާސްތާގެ އަމާޒުތަކެއް ކަނޑައެޅިގެންދާނެ ކަމުގައި، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވިއެވެ.

Advertisement

ރައީސުލްޖުމްހޫރިއްޔާ ވިދާޅުވީ، ރައްޔިތުންގެ އުއްމީދުތަކާއި ވިސްނުންތައް ހިއްސާކުރުމަށް ލަހެއް ނުވެ ފުރުޞަތު ހުޅުވައިލައްވާނެ ކަމަށެވެ. މިގޮތުން،  ބޭނުމަކީ ދިވެހިރައްޔިތުންގެ ހުވަފެންތަކާއި ތަޞައްވުރުތަކުގެ އެހީގައި ރައްޔިތުން އެދޭގޮތަށް ދިވެހިރާއްޖޭގެ މުސްތަޤްބަލް ކުރަހައި ބައްޓަންކުރުން ކަމަށާއި، ރައްޔިތުންގެއެ ހުށަހެޅުންތަކުގެ މައްޗަށް، ކުރިއަށް އޮތް 20 އަހަރު ދުވަހަށް، ޤައުމީ ތަރައްޤީގެ މާސްޓަރ ޕްލޭނެއް އެކުލަވައިލައި، އެ ޕްލޭނަށް ޤާނޫނީ ބާރުވެރިކަން ހޯއްދަވައި ދެއްވާނެ ކަމުގައިވެސް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވިއެވެ.

ޤައުމީ ތަރައްޤީގެ މާސްޓަރ ޕްލޭނެއްގެ މުހިއްމު ކަމުގެ މައްޗަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވާހަކަފުޅު ދެއްކެވި އިރު، ދިވެހިރާއްޖޭގެ ޖުމްހޫރީ ހަޔާތުގައި މިހާތަނަށް ފެންނަމުން އައީ އެއްވެސް ދުރުރާސްތާ ވިސްނުމެއް ނެތް ތަރައްޤީގެ މަޝްރޫޢުތަކެވެ. ކޮންމެ 5 އަހަރަކުން ވެރިކަން ބަދަލުވުމާއި އެކު ތަރައްޤީގެ މަޝްރޫޢުތައް ބަދަލުވެ ހުއްޓިގެންދެއެވެ.

ރާއްޖޭގައި އެންމެ ފުރަތަމަ ތަރައްޤީގެ މާސްޓަރ ޕްލޭނެއް އެކުލަވާލެއްވީ، ރައީސުލްޖުމްހޫރިއްޔާ އަލްއުސްތާޛު މައުމޫނު ޢަބުދުލްޤައްޔޫމުގެ ވެރިކަމުގައި، "2020ގެ ތަޞައްވަރު"ގެ ނަމުގައެވެ. އެެހެން ނަމަވެސް ތަރައްޤީގެ އެ ޕްލޭނާއި އެއްގޮތަށް ފާއިތުވި 20 އަހަރުގެ ތެރޭގައި ކަންކަން ކުރިޔަށް ގެންދެވިފައެއް ނުވެއެވެ.