ސްޓަންޓް މަނުންނަކީ ވަރުގަދަ އެކްޝަން ފިލްމުތަކުގެ މައިގަނޑު އެއް ތަނބެވެ. ސަބަބަކީ ގިނަ އެކްޓަރުންނަށް މިފަދަ ވަރުގަދަ އެކްޝަން ސީންތައް އަމިއްލައަށް ހަދަން ނުކެރުމެވެ. އަނެއްކަމަކީ މި ސީންތަކުގެ ރިސްކު ބޮޑުވުމެވެ. އެހެންކަމުން އެކްޓަރުންގެ ބޮޑީ ޑަބަލް ހޯދައިގެން މި އެކްޝަން ސީންތައް ކުޅޭއިރު ފިލްމު ބަލާ މީހުނަށް ހަމަ ހީވާނީ މިއީ އެކްޓަރުގެ މޮޅު ސްޓަންޓްތައް ކަމަށެވެ. ނަމަވެސް، ފަރުދާގެ ފަހަތުގައި ފޮރުވިފައިވާ ސްޓަންޓް މަނުންގެ ބުރަ މަސައްކަތް ހަމަ އެގޮތުގައި ފޮރުވިފައި އޮންނަނީއެވެ.

ޑޭވިޑް ލީޗްއަކީ ހޮލީވުޑް ފިލްމުތައް ބަލާ ފަރާތްތަކަށް އައު ނަމަކަށް ނުވާނެއެވެ. 'ޖޯން ވިކް' ، 'ޑެޑް ޕޫލް' 'އެޓޮމިކް ބްލޮންޑް' ފަދަ ވަރުގަދަ އެކްޝަން ފިލްމުތައް ޑޭވިޑް ލީޗް ވަނީ މިހާތަނަށް ގެނެސްދީފައެވެ. ސްޓަންޓް މަނެއްގެ ގޮތުގައި ކެރިއަރ ފެށި ޑޭވިޑް ލީޗްގެ ކުރިއަށް އޮތް ފިލްމަކީ 'ދަ ފޯލް ގާއި' އެވެ. މި ފިލްމުގައި ރިޔާން ގޯސްލިންގ ކުޅެނީ ސްޓަންޓް މަނެއްގެ ރޯލެވެ. އެހެންކަމުން މިއީ ޑޭވިޑް ލީޗްގެ ދިރިއުޅުމާ ވަރަށް ބޮޑަށް ގުޅިފައިވާ ފިލްމެއްކަމަށް މީޑިއާތަކުން އަންނަނީ ބުނަމުންނެވެ. ސްޓަންޓް މަނެއްގެ ގޮތުގައި ކެރިއަރ ފެށި ޑޭވިޑް ލީޗް އަކީ މިހާރު ކާމިޔާބު ޕްރޮޑަކްޝަން ހައުސްއެއް ހިންގާ ފަރާތެކެވެ.

'ދަ ފޯލް ގާއި' ގެ ޓްރެއިލަރ މިހާރު ނެރެފައިވާއިރު، ރިޔާން ގޯސްލިންގ ގެ އިތުރުން މި ފިލްމުގައި އެމިލީ ބްލަންޓް، އާރަން ޓެއިލަރ ވެސް ހިމެނެއެވެ. މި ފިލްމު ރިލީސްކުރުމަށް ހަމަޖެހިފައި ވަނީ އަންނަ އަހަރުގެ މާރިޗު މަހުގެ 1 ވަނަ ދުވަހުއެވެ. މި ފިލްމުގެ ޓްރެއިލަރ އަށް މިހާރުވެސް ދަނީ ބޮޑު ތަރުހީބެއް ލިބެމުންނެވެ.