ބޮލީވުޑްގެ ކިންގް ޚާންގެ އުފަންދުވަސް އޭނާގެ ފޭނުން އަބަދުވެސް ވަރަށް ކުލަގަދަކޮށް ފާހަގަކުރެއެވެ. ހާއްސަކޮށް، އެދުވަހު އޭނާ ދިރިއުޅޭ ގެ ކަމުގައިވާ 'މަންނަތު' ކައިރިއަށް އެތައް ހާސް ބަޔަކު އެއްވެއެވެ. މިފަހަރު ވެސް އެ ހުރިހާ ކަމެއް އޮތެވެ. ނަމަވެސް ފޭނުން އުފާ ކޮށްދިނުމަށް ޝާހްރުކް ޚާން ވަނީ ވަރަށް ހާއްސަ ދެކަމެއް ކޮށްފައެވެ. ފުރަތަމަ ކަމަކީ މިއަހަރުގެ އެންމެ ބޮޑު ހިޓު 'ޖަވާން'ގެ އެކްސްޓެންޑެޑް ކަޓެއް ނެޓްފްލިކްސް އަށް ދޫކޮށްލުމެވެ. އަނެއް ކަމަކީ އޭނާގެ ކުރިއަށް ނުކުންނަން އޮތް ފިލްމު 'ޑަންކީ'ގެ ފުރަތަމަ ޓީޒާ ބެލުންތެރިންނަށް ދޫކޮށްލުމެވެ.

'ޑަންކީ' އަކީ ދެވަނަ ތަޢާރަފަކަށް ބޭނުންނުވާ ޑައިރެކްޓަރެއް ކަމުގައިވާ ރާޖްކުމާރް ހިރާނީ އެނބުރި ޑައިރެކްޝަނަށް އަންނަ ފިލްމެވެ. މިއީ މިހާތަނަށް މުޅިން ވެސް ސުޕަރހިޓް ފިލްމުތައް ގެނެސްދީފައިވާ ޑައިރެކްޓަރެކެވެ. އެންމެ ފާހަގަކޮށްލެވޭ ފިލްމުތަކުގެ ތެރޭގައި 'މުންނާ ބާއީ އެމް.ބީ.ބީ.އެސް' ، '3 އީޑިއަޓްސް' އަދި 'ޕީކޭ' ފާހަގަކޮށްލެވެއެވެ. ރާޖްކުމާރް ހިރާނީގެ އެންމެ ފަހުގެ ފިލްމަކީ އޭނާާގެ ގިނަ ފިލްމުތަކުން ފެނިގެންދިއަ ސަންޖޭ ދަތްގެ މައްޗަށް އުފެއްދި ބަޔޮޕިކް ކަމުގައިވާ 'ސަންޖޫ' އެވެ. 2018 ވަނަ އަހަރުގެ މި ފިލްމަށް ވެސް ބެލުންތެރިންގެ އެތައް ސަޕޯޓެއް ލިބުނެވެ. އަދި ރަންބީރް ކަޕޫރުގެ އެކްޓިންގއަށް އެތައް ތައުރީފެއް ލިބުނެވެ.

'ސަންޖޫ' އަށް ފަހު ރާޖްކުމާރް ހިރާނީ މި ގެނެސްދެނީ 'ޑަންކީ' އެވެ. މިއީ ރާޖްކުމާރް ހިރާނީ އާއި ޝާހްރުކްޚާންގެ ފުރަތަމަ ކޮލަބޮރޭޝަނެވެ. އެހެންކަމުން، ގިނަބަޔަކު އަނެއްކާވެސް އުއްމީދު ކުރަނީ މޮޅު ޖަޒުބާތުން ފުރިގެންވާ ފިލްމަކަށް މި ފިލްމު ވެސް ވެގެންދާނެ ކަމަށެވެ. 'ޑަންކީ' ގައި ޝާހްރުކް ޚާންގެ އިތުރުން ތާޕްސީ ޕައްނޫ، ވިކީ ކައުޝަލް އަދި ބޮމަން އިރާނީ ވެސް ފެނިގެންދާނެއެވެ. މި ފިލްމު ބެލުންތެރިންނަށް ފެނިގެންދާނީ ކުރިއަށް އޮތް ޑިސެމްބަރު މަހުގެ 22 ވަނަ ދުވަހުއެވެ.