އިންގްލިޝް ޕްރިމިއަ ލީގުގައި އާދިއްތަ ދުވަހު ވެސްޓްހަމް އާއި ކުޅުނު މެޗު 2-2 ން އެއްވަރުވެ, ވިހި އަހަރަށް ފަހު ޕްރިމިއަ ލީގުގެ ތަށި އަލުން އުފުލާލުމަށް އާސެނަލް އިން ކުރަމުން އަންނަ އުއްމީދަށް, މުބާރާތުގެ އެންމެ ފަހުގެ ޗެމްޕިއަން, މެންޗެސްޓަރ ސިޓީގެ ހިޔަނި އެޅިއްޖެއެވެ. 

ވެސްޓްހަމްގެ ލަންޑަން ސްޑޭޑިއަމްގައި ކުޅުނު މި މެޗުގެ 7 ވަނަ މިނެޓުގައި ބެން ވައިޓްގެ ހުރަހަކުން ގެބްރިއަލް ޖީސުސް ކާމިޔާބު ކުރި ގޯލާއެކު, މެޗުގެ ކުރި ހޯދީ އާސެނަލް އިންނެވެ. އަދި އޭގެ 3 މިނެޓު ފަހުން އޮޑެގާޑް ގޯލެއް ޖަހާ, އާސެނަލްގެ ލީޑު ފުޅާ ކޮށްދިނެވެ. 

ވެސްޓްހަމް އެމީހުންގެ ފުރަތަމަ ގޯލު ކާމިޔާބު ކުރީ ޕެނަލްޓީ އަކުންނެވެ. ލޫކަސް ޕަކުއެޓާއަށް އާސެނަލްގެ ޑިފެންޑަރ ގެބްރިއަލް ކުރި ފައުލަކަށް ލިބުނު ޕެނަލްޓީ އެ ޓީމަށް ކާމިޔާބު ކޮށްދިނީ ސައިދް ބެންރަހްމާ އެވެ. 

މެޗުގެ 52 ވަނަ މިނެޓުގައި ލީޑު ފުޅާ ކުރުމަށް އާސެނަލްއަށް ލިބުނު ޕެނަލްޓީ ވަނީ ބޭކާރު ވެފައެވެ. ވެސްޓްހަމްގެ ޕެނަލްޓީ އޭރިއާ ތެރެއިން އެ ޓީމުގެ މިކައިލް އެންޓޯނިއޯ އަތުގައި ބޯޅަ ޖެހުމުން ލިބުނު ޕެނަލްޓީ އާސެނަލްއަށް ކާމިޔާބު ކޮށްދޭން ނިކުތީ މި ސީޒަނުގައި މޮޅު ކުޅުމެއް ދައްކަމުން އަންނަ ބަކަޔޯ ސަކާއެވެ. ނަމަވެސް, ސަކާ ފޮނުވާލި ބޯޅަ ވަނީ ގޯލާއި އަމާޒުވާގޮތް ނުވެފައެވެ.

މީގެ ނަތީޖާއަކަށްވީ އޭގެ 2 މިނެޓުފަހުން ވެސްޓްހަމްގެ ޖެރޮޑް ބޮވެން ވެސްޓްހަމްއަށް ގޯލެއް ކާމިޔާބު ކޮށްދީ, މެޗުގެ ނަތީޖާ ހަމަހަމަ ކުރުމެވެ. އަދި މެޗުން ބަލިނުވެ އާސެނަލްއަށް ސަލާމަތްވެވުނީ ކިރިޔާއެވެ. މެޗު ނިމެން ގާތްވެފައިވަނިކޮށް ވެސްޓްހަމްގެ އިސްކޮޅުން ދިގު ފޯވާޑް, އެންޓޯނިއޯ ބޮލުން ފޮނުވާލި ހަމަލާ އަމާޒުވީ ގޯލު ދަނޑިއާއެވެ.

މި ސީޒަނުގައި އާސެނަލްއިން ތަށި އުފުލާލުމަށް ކުރާ ދަތުރުގައި މި ފަހަކަށް އައިސް މިވަނީ އުނދަގޫތަކާ ކުރިމަތިލާން ޖެހިފައެވެ. އެގޮތުން މިދިޔަ ހަފްތާގައި ލިވަޕޫލް އާއި ބައްދަލު ކުރި މެޗު ވެސް ވަނީ 2-2 އިން އެއްވަރު ވެފައެވެ. އެހެންކަމުން 2 މެޗުން 4 ޕްއިންޓު އާސެނަލްއަށް ގެއްލުނު އިރު, މެންޗެސްޓަރ ސިޓީ އާއި ދެމެދު އޮތް ފަރަގު ވެސް މިވަނީ 4 ޕޮއިންޓަށް ކުޑަވެފައެވެ. އަދި އެއީ އާސެނަލް ސިޓީއަށް ވުރެން އިތުރަށް 1 މެޗު ކުޅެގެނެވެ. 

މި ނަތީޖާ އާއިއެކު ލީގު ކާމިޔާބު ކުރުމުގެ ގަދަހިފުމަކަށް ވާނީ މި މަހުގެ 26 ވަނަ ދުވަހު ސިޓީގެ ދަނޑުގައި މި ދެޓީމު ބައްދަލު ކުރާ މެޗެވެ. އެ މެޗު ސިޓީއިން ކާމިޔާބު ކޮށްފިނަމަ, ލީގު ނެގުމުގެ ފުރިހަމަ ބާރު އެޓީމަށް ލިބޭނެއެވެ.