Advertisement
އެމެރިކާގެ މަނަވަރެއް މެޑިޓެރޭނިއަން ކަނޑުގައި ---
މެޑިޓެރޭނިއަން ކަނޑުގައި އޮތް އެމެރިކާގެ އަސްކަރީ މަނަވަރުތަކަށް ހަމަލާދޭނެ އިންޒާރުދީފި
އިޒްރޭލުން ފަލަސްޠީނުގެ ޣައްޒާގައި ހިންގަމުންދާ ޤަތުލު ޢާއްމުތަކަށް ވާގިވެރިވަމުންދާ އެމެރިކާގެ އަސްކަރީ މަނަވަރުތަކަށް، ހަމަލާ ދޭނެ ކަމުގެ އިންޒާރު ހޫތީން ދީފިއެވެ.
ޔަމަނުގެ ހޫތީންގެ އަސްކަރިއްޔާއިން ކުރި ޕޯސްޓެއްގައި ވަނީ، އެމެރިކާގެ ކަނޑުގެ މަނަވަރަކާއި ދިމާއަށް ގިނަ އަދަދެއްގެ މިސައިލްތައް ދަތުރުކުރާ މަންޒަރުފެންނަ ފޮޓޯއެއް އާއްމުކޮށްފައެވެ. އެއިން މާނަކޮށްދެނީ ހޫތީން އެމެރިކާގެ މަނަވަރުތަކަށް ހަމަލާދޭނެ ކަންކަމުގައިވެސް ހަނގުރާމަ ދިރާސާކުރާ ފަރާތްތަކުން ވަނީ ބުނެފައެވެ.
ހޫތީން ރަސްމީކޮށް އިޒްރޭލާއި ދެކޮޅަށް ހަނގުރާމަ އިޢުލާނުކޮށްފައި ވާއިރު، އިޒްރޭލުގެ ދެކުނުގެ ސަރަހައްދުތަކަށް ހޫތީން ދަނީ، ދުރުރާސްތާ މިސައިލްތަކުން ހަމަލާދެމުންނެވެ. އޭގެ ތެރެއިން ބައެއް މިސައިލްތައް ސައޫދީ އަރަބިއްޔާއިންނާއި އުރުދުން އަދި އިޒްރޭލުން ވަނީ ހުއްޓުވާފައެވެ. އެހެން ނަމަވެސް ހޫތީންގެ މިސައިލް ހަމަލާތައް އަރައި، އީލާތާއި ތެލްއަވީވަށް ގެއްލުންތައް ލިބިފައިވާ ކަމުގައި ޚަަބަރުތައް ބުނެފެއެވެ.
އެމެރިކާގެ އަސްކަރީ މަނަވަރުތަކަށް ހަމަލާދޭނެ ކަމުގެ އިންޒާރުތައް ދިނުމުގެ އިތުރުން، ހަނގުރާމަމަތީ މަތިންދާ ބޯޓުތައް ބޭނުންކޮށްގެން އިޒްރޭލާއި ދެކޮޅަށް ހަމަލާދޭނެ ކަމުގައިވެސް ހޫތީން ވަނީ ބުނެފައެވެ.
