ޤަތަރުގެ ސިއްރުތައް އިޒްރޭލަށް ޖާސޫސްކޮށްދިން އިންޑިޔާ ސިފައިންގެ ތެރޭގައި ކުރިން މަސައްކަތްކޮށްފައިވާ 8 މީހެއްގެ މައްޗަށް ޤަތަރުން މަރުގެ ޙުކުމް އިއްވައިފިއެވެ.

މި 8 މީހުންގެ މައްޗަށް މަރުގެ އަދަބު ކަނޑައަޅާފައި ވަނީ އެމީހުންގެ މައްޗަށް ހިންގުނު ޝަރީޢަތްތަކަށްފަހުގައި، އެމީހުން މެރުމަށް ޙުކުމްކޮށްފައި ވަނީ އިއްޔެއެވެ. އިޒްރޭލަށް އެމީހުން ޖާސޫސްކޮށްދީފައި ވަނީ، ޤަތަރުގެ އަސްކަރީ މަޢުލޫމާތެކެވެ. މިގޮތުން އިޓަލީން ޤަތަރަށް ފޯރުކޮށްދީފައިވާ އަސްކަރީ ސަބްމެރިނަކާއި ގުޅޭ މައުލޫމާތުތައް ވަގަށް ނަގައި އެމައުލޫމާތު ވަނީ މޮސާޑަށް ފޯރުކޮށްދީފައެވެ.

ޤަތަރުގެ މީޑިއާތަކުން ބުނެފައިވާ ގޮތުގައި އިޒްރޭލަށް ޖާސޫސްކޮށްދިން އިންޑިއާ ސިފައިންގެ 8 މީހުން މަސައްކަތް ކުރަމުންދިޔައީ ޤަޠަރްގެ އަލްދަހްރާ ކުންފުނީގެ މުވައްޒަފުންގެ ގޮތުގައެވެ. އެމީހުން އިޒްރޭލަށް ޖާސޫސްކޮށްދޭކަން ފަޅާއަރައި، އެ 8 މީހުން ޤަޠަރުގެ ފުލުހުން ހައްޔަރުކޮށްފައި ވަނީ، މިއަހަރުގެ އޮގަސްޓަމަހުގެ ތެރޭގައެވެ. ޤަޠަރު ސަރުކާރުން ބުނެފައި ވަނީ، އެ މީހުން އިޒްރޭލަށް ޖާސޫސްކޮށްދެމުން ދިޔަކަމުގެ ސާފު ހެކި ލިބިފައިވާކަމަށެވެ.

Advertisement

އިންޑިއާގެ 8 މީހުންގެ މައްޗަށް މަރުގެ ހުކުމް އިއްވުމާއިއެކު އިންޑިއާގެ އެކްސްޓަރނަލް އެފެއާޒް މިނިސްޓްރީން ވަނީ އެކަމާއި މެދު ކަންބޮޑުވުން ފާޅުކޮށް ބަޔާނެއް ނެރެފައެވެ.

އިޒްރޭލަށް ޖާސޫސްކޮށްދިނުމުގެ ކުށުގައި އިންޑިއާ ސިފައިންގެ ކުރީގެ 8 އޮފިސަރެއްގެ މައްޗަށް ޤަޠަރުން މަރުގެ އަދަބު ކަނޑައެޅި އިރު، މިހާރު އިންޑިއާގައި އޮތް ހަރުކަށި ހިންދޫންގެ ސަރުކާރަކީ، އިޒްރޭލަށް އެކި ގޮތްގޮތުން މަދަދާއި ވާގި ދެމުންއަންނަ އިސްލާމީ ޤައުމުތަކާއި ދުޝްމަން ސަރުކާރެކެވެ. އަދި ޣައްޒާގައި މިހާރު އިޒްރޭލުން ހިންގާ ހަނގުރާަމައިގެ ކުށްތަކާއި، ނަސްލު ނައްތާލުމުގެ ޢަމަލުތަކާއި، ޤަޠުލުއާއްމުތަކަށް އިންޑިއާގެ މިހާރުގެ ސަރުކާރުން ދަނީ ފާޅުގައި ތާއީދު ކުރަމުންނެވެ.