ޤައުމީ އެމްބިއުލާންސްގެ ޚިދުމަތް ރަސްމީކޮށް ފަށައިފިއެވެ. ސިއްޙީ ނިޒާމު އިތުރަށް ހަރުދަނާކުރުމަށް ކުރަމުންދާ މަސައްކަތުގެ ދަށުން ޤައުމީ އެމްބިއުލާންސް ޚިދުމަތް ފެށުމަށް ޖުމްހޫރީ މައިދާނުގައި ބޭއްވި ރަސްމިއްޔާތެއްގައި މިޚިދުމަތް ފައްޓަވާދެއްވީ މިނިސްޓަރ އޮފް ހެލްތު އަޙްމަދު ނަސީމެވެ.

މި ޚިދުމަތް އެންމެ ފުރަތަމަ ފަށާފައިވަނީ މާލެ ސަރަޙައްދުގައެވެ. ޤައުމީ އެމްބިއުލާންސްގެ ޚިދުމަތް ދިނުމަށްވަނީ 24 ގަޑިއިރުގެ ކޯލް ސެންޓަރެއް ޤާއިމުކޮށްފައެވެ. މާލެ ސަރަޙައްދުގައި ޚިދުމަތްދިނުމަށް މިސަރަޙައްދުގެ ހުރިހާ ސިއްޙީ ފަރުވާ ދޭތަންތަން ގުޅިގެން މަސައްކަތް ކުރުމަށްވަނީ ހަމަޖެހިފައެވެ.

ފޮޓޯ: ހެލްތް މިނިސްޓްރީ

މިޚިދުމަތާއެކު އެއް ނަންބަރެއް މެދުވެރިކޮށް އެމްބިއުލާންސްގެ ޚިދުމަތް ލިބިގެންދާނެއެވެ. ސިއްޙީ ކުއްލި ޙާލަތެއްގައި 100 އަށް ގުޅުމުން ޕެރަމެޑިކާއެކު އެކްސިޑެންޓު ހިނގާފައިވާ ތަނަށް ނުވަތަ ބަލިމީހާ އޮތް ސަރަޙައްދަށް ގޮސް ހޮސްޕިޓަލަށް ގެންދިޔުމުގެ ކުރިން ބަލިމީހާ ސްޓޭބަލައިޒްކުރުމަށް މަސައްކަތް ކުރާނެއެވެ. އަދި ބަލިމީހާ އޮތް ސަރަޙައްދަކާއި އެންމެ ގާތުގައި ހުރި ހޮސްޕިޓަލަށް އެމްބިއުލާންސްދާއިރު ބަލި މީހާގެ މަޢުލޫމާތު ލިބިފައިވާ ޓީމެއް ޕޭޝަންޓަށް އެޓެންޑްވުމަށް ތައްޔާރަށް އޮންނާނެކަމަށް ހެލްތު މިނިސްޓްރީން ވިދާޅުވެއެވެ.

މި ޚިދުމަތް ފައްޓަވާ ދެއްވާ ވާހަކަފުޅުދައްކަވަމުން ހެލްތު މިނިސްޓަރ ވިދާޅުވީ، ސިއްޙީ ނިޒާމު ފުރިހަމަ ނިޒާކަމަށް ހެދުމަށް މިއީ މުހިއްމު ޚިދުމަތެއްކަމަށެވެ. އަދި މާޒީގައި ހިނގާފައިވާ ޙާދިސާތައް ތަކުރާރުވިޔަނުދީ ރައްޔިތުންގެ ދުޅަހެޔޮކަން ކަށަވަރުކުރުމަށް މިއީ ކޮންމެހެން ޤާއިމުކުރަންޖެހޭ ޚިދުމަތެއްކަމުގައި ހެލްތު މިނިސްޓަރ ވިދާޅުވިއެވެ.

މާލެ ސަރަޙައްދުގައި މިޚިދުމަތް ފެށިނަމަވެސް، ކުރިއަށް އޮތްތަނުގައި އަތޮޅު ތެރޭގެ ސިއްޙީ ޚިދުމަތްދޭ ތަންތަނުންވެސް މިޚިދުމަތް ލިބޭނެހެން ޚިދުމަތް ފުޅާކުރެއްވުމަށް ނިންމަވާފައިވާކަމަށް ހެލްތު މިނިސްޓްރީން ވިދާޅުވެއެވެ. އަދި ސީ އެމްބިއުލާންސާއި އެއަރ އެމްބިއުލާންސްގެ ޚިދުމަތްވެސް މިނަންބަރު މެދުވެރިކޮށް ލިބޭނެ އިންތިޒާމު ހަމަޖެއްސުމަކީ އަމާޒެއްކަމަށް އެމިނިސްޓްރީން ވިދާޅުވެއެވެ.