ފެނަކަ ކޯޕަރޭޝަނުގެ 75 މައްސަލައެއް ބަލަމުންދާކަމަށާއި، އެކުންފުންޏަށް ގެއްލިފައިވާ 20 މިލިޔަނަށްވުރެ ގިނަ ފައިސާ އަނބުރާ ހޯދަން އަންގާފައިވާ ކަމަށް ބުނެ، އެންޓިކޮރަޕްޝަން ކޮމިޝަނުން ނެރެފައިވާ ބަޔާނުގައި ބައެއް މައުލޫމާތު ހިމަނާފައި ވަނީ ހަޤީޤަތް އޮޅޭ ގޮތަށް ކަމުގައި ފެނަކަ ކޯޕަރޭޝަނުން ބުނެފިއެވެ.

މިދައުރުގެ ތެރޭގައި ފެނަކަ ކޯޕަރޭޝަންގެ ތެރޭގައި ކޮރަޕްޝަނުގެ ގިނަ އަމަލުތަކެއް ހިނގާފައިވާ ކަމަށް ބުނެ، އިދިކޮޅު ސިޔާސީ ފަރާތްތަކުން ދިޔައީ ސަރުކާރު ބަދުނާމުކޮށް އެންޓިކެމްޕޭންތައް ކުރަމުންނެވެ. އެފަރާތްތަކުގެ ވާހަކަތަކަށް ބާރުލިބޭ ގޮތަށް، މައުލޫމާތު އޮޅޭ ގޮތަށް އޭސީސީން ވަނީ ބަޔާނެއް ނެރެފައެވެ. އެބަޔާނުގައި ބުނެފައި ވަނީ، ފެނަކަ ކޯޕަރޭޝަނުގެ 75 މައްސަލައެއް ބަލަމުންދާކަމަށާއި، އެކުންފުންޏަށް ގެއްލިފައިވާ 20 މިލިޔަނަށްވުރެ ގިނަ ފައިސާ އަނބުރާ ހޯދުމަށް ކުންފުންޏަށް އަންގާފައިވާ ކަމަށެވެ. އެހެން ނަމަވެސް އެއީ ކޮން މުއްދަތެއްގެ މައްސަލަތަކެއް ކަމެއް އޭސީސީގެ ބަޔާނުގައި ހާމަކޮށްފައި ނެތުމަކީ، އޭސީސީން މައުލޫމާތު ހާމަކުރުމުގައި، އޮޅުވާލީކަމަށް ތުހުމަތު ކުރެވޭ ކަމެކެވެ.

ފެނަކަ ކޯޕަރޭޝަނުން އެކަމާއި ގުޅޭ ގޮތުން މިއަދު ނެރުނު ބަޔާނުގައި ވަނީ، އޭސީސީގެ ބަޔާނުގައި ނުހިމަނައި ދޫކޮށްލާފައިވާ ބައެއްކަންކަން ސާފުކޮށްދީފައެވެ. މިގޮތުން އޭސީސީން ބަލަމުންދާކަމަށް ބުނާ 75 މައްސަލަ އަކީ، 2012 ވަނަ އަހަރުން ފެށިގެން 2017 ވަނަ އަހަރާއި ދެމެދުގެ މައްސަލަތައް ކަމަށާއި، އަނބުރާ ހޯދުމަށް އަންގާފައިވާ، 20 މިލިޔަން ރުފިޔާއަކީވެސް އެމުއްދަތުގެ ތެރޭގައި ކުންފުންޏަށް ގެއްލިފައި ހުރި ފައިސާ ކަމުގައި ފެނަކަ ކޯޕަރޭޝަނުން ވަނީ ބުނެފައެވެ.

މިގޮތުން އޭސީސީން ފާހަގަކޮށްފައިވާ ބައެއް މައްސަލަތަކުގެ ތަފްސީލްތަކާއި އެމައްސަލަތަކާއި ގުޅޭ ފައިސާގެ އަދަދުތައް ވަކި ވަކިން އެގޭނެހެން ފެނަކައިން ވަނީ މައުލޫމާތު އާއްމުކޮށްފައެވެ.

އޭސީސީގެ ބަޔާނުގައި މައްސަލަތަކުގެ މުއްދަތު ނުހިމަނައި މައުލޫމާތު އާއްމުކޮށްފައި ވާއިރު، 92 ކަމެއް އިސްލާހްކުރުމަށާއި، ހިންގުމާއި ގުޅޭ އިދާރީކަންކަމުގެ 48 ކަމެއް ރަނގަޅު ކުރުމަށާއި، ކުންފުނީގެ ސިޔާސަތުތަކާއި ގުޅޭ 24 ކަމެއް ރަނގަޅު ކުރުމަށް އަންގާފައިވާ ކަމުގައި އޭސީސީން ވަނީ ބުނެފައެވެ. 

އޭސީސީން ބަލާ މައްސަލަތަކުގެ މައުލޫމާތު އާއްމު ކުރުމުގައި އެކޮމިޝަނުން، ޢަމަލުކުރާ ގޮތާއި މެދު ފާޑުކިޔުންތައް ވަނީ އަމާޒުވެފައެވެ.