ރައްޔިތުންގެ މަޖިލީހުގެ އިންތިހާބީ ދާއިރާތައް ކަނޑައަޅާފައިވާ ގޮތާ ބެހޭގޮތުން އެންމެ ގިނަ ޝަކުވާ ލިބިފައި ވަނީ އައްޑޫ ސިޓީންކަމުގައި އިލެކްޝަންސް ކޮމިޝަނުން ހާމަކޮށްފިއެވެ.

އެެކޮމިޝަންގެ ނައިބު ރައީސް އިސްމާއީލް ޙަބީބު ވިދާޅުވީ، ރައްޔިތުންގެ މަޖިލީހުގެ 2024 ވަނައަހަރުގެ އިންތިޚާބީ ދާއިރާތަކަށް އާބާދީ ކަނޑައަޅާފައިވާގޮތުގެ ވަގުތީ ރިޕޯޓަށް 65 ޝަކުވާ ލިބިފައިވާ ކަމަށެވެ. އަދި ލިބިފައިވާ ޝަކުވާތަކާއި ޚިޔާލުތަކާއި މެދު، 2023 ނޮވެމްބަރު 5 ގެ ކުރިން އީސީ އިން ގޮތެއް ކަނޑައަޅައި، އަދި އެ ޝަކުވާއެއް ނުވަތަ ޚިޔާލު ހުށަހެޅި ފަރާތްތަކަށް އީސީ އިން ނިންމާ ނިންމުން ސަބަބާއެކު އަންގާނެކަމުގައިވެސް ޙަބީބު ވިދާޅުވިއެވެ.

އިލެކްޝަންސް ކޮމިޝަނުން މިއަދު އާއްމު ކުރި މައުލުމާތަށް ބަލާއިރު، އިތުރުވި ދާއިިރާތަކާއި ގުޅޭ ގޮތުން އެންމެ ގިނަ ޝަކުވާ ހުށައަޅާފައި ވަނީ އައްޑޫ ސިޓީ ފޭދޫ އުތުރު ދާއިރާއަށެވެ. އެދާއިރާއާ ގުޅޭ ގޮތުން 44 ޝަކުވާއެއް ކޮމިޝަނަށް ހުށައަޅާފައި ވެއެވެ.

އައްޑޫ ސިޓީ ފޭދޫ އުތުރު ދާއިރާއާ ގުޅޭ ގޮތުން 44 ޝަކުވާއެއް ހުށައަޅާފައި ވާއިރު، އެހެން ދާއިރާތަކާއި ގުޅޭ ގޮތުން ޝަކުވާ ނުވަތަ ޚިޔާލު ހުށައަޅާފައި ވަނީ، އެންމެ ގިނަވެގެންވެސް ދެ ފަރާތަކުންނެވެ.

އާބާދީއަށް އަންނަ ބަދަލާއި ގުޅިގެން އިދާރީ ދާއިރާތަކަށް ކޮންމެ 5 އަހަރަކުން ބަދަލުތައް ގެނެއެވެ. މިގޮތުން ކޮންމެ 5 އަހަރަކުން މަޖިލީހަށް 6 ގޮނޑިއެއް އިތުރުވަމުން އަންނައިރު، 20 ވަނަ ރައްޔިތުންގެ މަޖިލިހަށް އިތުރުވި 6 ގޮނޑިއާއެކު، އަލަށް އިންތިޚާބުވާ މަޖިލީހުގައި 93 މެމްބަރުން ތިއްބަވާނެއެވެ.