ޣައްޒާގެ ރައްޔިތުންނާއި އެކު ތިބިކަން ހާމަކޮށް މިސްރުގެ ރައްޔިތުން ތަހްރީރް މައިދާނަށް އެއްވެއްޖެއެވެ.

މިސްރުގެ ވެރިރަށް ޤާހިރާގެ މެދުތެރޭގައިވާ ތަހްރީރު މައިދާނަކީ، ރައްޔިތުން ނުކުމެ އިހްތިޖާޖުތައްކޮށް މިސްރަށް އިންޤިލާބީ ބޮޑު ބަދަލުތައް ގެނުވި މައިދާނެކެވެ. 2013 ވަނަ އަހަރުގެ ފަހުން ތަހްރީރް މައިދާނުގައި އެއްވުންތައް ބޭއްވުމަށް މިސްރު ސަރުކާރުން ފުރުޞަތެއް ނުދެއެވެ. އެހެންކަމުން ސަރުކާރުން އަޅާފައިވާ ފިޔަވަޅުތައް މުގުރާލައި، މިސްރުގެ އާއްމު ރައްޔިތުން ފާއިތުވި 10 އަހަރުގެ ތެރޭގައި ތަހްރީރް މައިދާނަށް އެއްވި މިއީ ފުރަތަމަ ފަހަރެވެ.

ރިޕޯޓްތައް ބުނާގޮތުގައި ފަލަސްޠީނުގެ މިނިވަންކަމަށް ގޮވާލައި، މިސްރުގެ އާއްމު ރައްޔިތުން ތަހްރީރް މައިދާނުގައި ބޭއްވި އެއްވުމުގެ ތެރެއިން 43 މީހަކު ވަނީ ހައްޔަރުކޮށްފައެވެ.

Advertisement

އިޒްރާއީޒުން ޣައްޒާއަށް ދެމުންދާ ހަމަލާތަކުގައި 4000 ވުރެ ގިނަ މީހުން ޝަހީދުވެ، އަދި ޣައްޒާއިން ފެނާއި ކަރަންޓް ކަނޑާލައި ކާބޯތަކެއްޗާއި ބޭސް ވެއްދޭނެ މަގުތައް އިޒްރާއީލުން ބަންދުކޮށްފައި އޮތުމާއި، އެކު، މިސްރާއި ޣައްޒާ ގުޅުވައިދޭ ރަފަހް ބޯޑަރު ހުޅުވާލައި މިސްރުގެ ތެރެއިން ޣައްޒާއަށް އެހީގެ ތަކެތި ފޯރުކޮށްދިނުމަށްވެސް މިސްރުގެ ރައްޔިތުން ދަނީ މަސައްކަތް ކުރަމުންނެވެ. މިގޮތުން ރަފަހް ބޯޑަރު ހުޅުވުމަށްޓަކައި ރަފަހް އެތަނަށްވެސް މިސްރުގެ އާއްމު ރައްޔިތުން ވަނީ ނުކުމެފައެވެ.

ފަލަސްޠީނުގެ މިނިވަންކަމަށް ގޮވާލައި، މިސްރުގެ ރައްޔިތުން ތަހްރީރް މައިދާނަށް ނުކުތް އިރު، 2011 ވަނަ އަހަރު ފެށިގެން އައި ޢަރަބި ބަހާރުގެ ތެރޭގައި، މިސްރުގެ ރައްޔިތުން އެ ޤައުމުގެ ރައީސް ހުސްނީ މުބާރަކްގެ ދިގުވެރިކަން ނިމުމަކަށް ގެނައީ ތަޙްރީރު މައިދާނުންނެވެ.