Advertisement
އިސްލާމީ މަރުކަޒު ---
ފަލަސްޠީނުގެ ރައްޔިތުންގެ ހައްޤުތައް ހޯދައިދިނުމަށް ގަދައަޅައި މަސައްކަތްކުރުމަށް ހުކުރު ޚުޠުބާގައި ގޮވާލައިފި
ފަލަސްޠީނުގެ ރައްޔިތުންގެ ހައްޤުތައް ހޯދައިދިނުމަށް ގަދައަޅައި މަސައްކަތްކުރުމަށް މިއަދުގެ ހުކުރުޚުޠުބާގައި ގޮވާލައިފިއެވެ.
މިއަދު މުޅިރާއްޖޭގެ މިސްކިތްތަކުގައި އިއްވި ހުކުރު ޚުޠުބާ ޚާއްސަކޮށްފައި ވަނީ، "މަސްޖިދުލްއަޤުޞާގެ މާތްކަން" މި މަޢުޟޫއަށެވެ.
މިއަދުގެ ހުކުރު ޚުޠުބާގައި ބުނެފައި ވަނީ، އަލްމަސްޖިދުލް އަޤުޞާ މިނިވަންކޮށް، ފަލަސްޠީނުގެ ރައްޔިތުންގެ ގެއްލިފައިވާ ޙައްޤުތައް އަނބުރައި އިޢާދަކުރެވޭތޯ ގަދައަޅައި މަސައްކަތް ކުރުމަކީ، މުސްލިމް ޤައުމުތަކުގެ ސަރުކާރުތަކާއި ރައްޔިތުންގެ މައްޗަށް އޮތް ވަރަށް މަތިވެރި ވާޖިބެއް ކަމަށެވެ.
Advertisement
އަދި މަސްޖިދުލް އަޤުޞާއާއި، ފަލަސްޠީނުގެ ރައްޔިތުންނާއި، ދުނިޔޭގެ ކަންކޮޅުތަކުގައި ނިކަމެތިވެފައިވާ، އެންމެހައި މުސްލިމުންނަށްޓަކައި، ޢިޚްލާސްޞްތެރިކަމާއި މަޑުމައިތިރިކަމާއި އެކު މާތްﷲއަށް ދުޢާކުރުމަށްވެސް މިއަދުގެ ހުކުރު ޚުޠުބާގައި ވަނީ ގޮވާލާފައެވެ.
މިއަދު ހުކުރު ޚުޠުބާގައި ވަނީ، މުސްލިމުންނާއި އަލްމަސްޖިދުލް އަޤުޞާއާއި އޮތް ގުޅުމާއި، ޤުދުސްގެ ތާރީޚުގެ މައްޗަށްވެސް އަލިއަޅުވާލާފައެވެ. މިގޮތުން ހުކުރު ޚުޠުބާގައި ބުނެފައި ވަނީ، އަލްޤުދުސްއަކީ، ސަލާމްލެއްވި އިބްރާހީމްގެފާނާއި، އެކަލޭގެފާނުގެ ދަރިފަސްކޮޅުން ވަޑައިގެންނެވި ގިނަ ނަބިއްޔުންގެ ފަސްގަނޑުކަމަށެވެ. އަދި އެއީ ސަލާމްލެއްވި ދާއޫދުގެފާނުގެ ވެރިކަމުގައި އެކަލޭގެފާނު ވެރިކަންކުރެއްވި ވެރިރަށް ކަމަށާ، އަދި އެކަލޭގެފާނުގެ ލޮބުވެތި ދަރިކަލުން ސުލައިމާން ޢަލައިހިއްސަލާމްގެ ބޮޑުވެރިކަން ހިންގެވި މާތްބިން ކަމުގައިވެސް ހުކުރު ޚުޠުބާގައި ވަނީ ބުނެފައެވެ.
ޤުދުސާއި ފަލަސްޠީނުގެ ބިމުގެ މައްޗަށް ޔަހޫދީ ކުރާ ދޮގުދައުވާތަކުގެ މައްޗަށް އަލިއަޅުވާލައި ހުކުރު ޚުޠުބާގައި ބުނެފައި ވަނީ، ސަލާމްލެއްވި އިބްރާހީމްގެފާނާއި، ސަލާމްލެއްވި ދާއޫދުގެފާނާއި، ސަލާމްލެއްވި ސުލައިމާންގެފާނަކީ، މުސްލިމުންކަމަށާއި އެބޭކަލުންނަކީ ތައުހީދުގެ އިމާމުން ކަމަށެވެ. އެހެންކަމުން ފަލަސްޠީނުގެ ބިމަކީ، ޔަހޫދީންގެ ނުވަތަ ޒަޔަނިސްޓުންގެ ތަނެއްގެ ގޮތުގައި ތާރީޚީގޮތުންވެސް، އަދި ދީނީގޮތުންވެސް ކަނޑައަޅާނޭތަނެއް ނެތްކަމަށާއި، އަލްމަސްޖިދުލް އަޤުޞާއަކީ، މުސްލިމުންގެ ޙައްޤެއްކަމުގައިވެސް ޚުޠުބާގައި ވަނީ ބުނެފައެވެ.
މިއަދުގެ ހުކުރު ޚުޠުބާގައި ވަނީ ފަލަޞްތީނުގެ ރައްޔިތުންނާއި ދެކޮޅަށް އިޒްރޭލުން ހިންގަމުންދާ ޢުދުވާންތައް ކުއްވެރިކޮށްފައެވެ. މިގޮތުން ޚާއްޞަ ގޮޮތެއްގައި، ގައްޒާގެ ހޮސްޕިޓަލަކަށް އިޒްރޭލުން ހަމަލާދީ އެއްފަހަރާ 500 ވުރެ ގިނަމީހުން ޝަހީދުކޮށްލި ޢުދުވާނީ ހަމަލާ ވަނީ ކުއްވެރިކޮށްފައެވެ.
