ކަނޑުގެ ލޮނުގަނޑު އުފުލި ދިވެހިރާއްޖެ އަޑިއަށް ހިނގައިދާނެ ކަމަށް ގަބޫލުނުކުރައްވާ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވުމުން އެކަމަށް ކުރީގެ ރައީސް މައުމޫނު އަބްދުލް ގައްޔޫމު ނުސީދާކޮށް ރައްދު ދެއްވައިފިއެވެ.

ކަނޑުގެ ލޮނުގަނޑު އުފުލި ރާއްޖެ އަޑިއަށް ހިނގައިދާނެ ކަމަށް ގަބޫލުނުކުރައްވާ ކަމަށް އިންތިހާބީ ރައީސް ޑރ. މުއިއްޒު ވިދާޅުވީ އަލްޖަޒީރާއަށް ދެއްވި އިންޓަވިއުއެއްގައެވެ. މި އިންޓަވިއުގައި މުއިއްޒު ވިދާޅުވީ، ދުނިޔެ ހޫނުވުމާއި، މޫސުމީ ބަދަލުތަކަކީ ސީރިއަސްކޮށް ވިސްނައި ހައްލު ހޯދަންޖެހޭ މައްސަލަތަކެއްކަމަށާއި، އެހެންނަމަވެސް، ރާއްޖެ އަޑިއަށް ދާނެކަމަށް ބުނާ ވާހަކަތައް ޤަބޫލުފުޅު ނުކުރައްވާކަމަށެވެ.

ޑރ. މުޙައްމަދު މުޢިއްޒު ވިދާޅުވީ 2050 ވަނަ އަހަރާއި ހަމައަށް ރާއްޖޭގެ 80 އިންސައްތަ އަޑިއަށްދާނެކަމަށް ބޭރުގެ ދިރާސާވެރިން ބުނާ ބުނުން ޤަބޫލުފުޅު ނުކުރައްވާކަމަށެވެ. އެބޭފުޅުން އެ ފާހަގަކުރައްވާ މިންވަރަށް ކަނޑުގެ ލޮނުގަނޑު އުފުލިގެންދާތަން ފެނިވަޑައިނުގަންނަވާކަމަށެވެ.

"ތެދުތެދަށް ބުނާ ނަމަ، އެ (ދިރާސާތަކަކީ) މާ ސީދާ އެއްޗެއްކަމަކަށް އަޅުގަނޑު ނުދެކެން. މީގެ 50 އަހަރުން ކުރިންވެސް ދައްކާ ވާހަކައަކީ އެއީ. އަދި ކަނޑުގެ ލޮނުގަނޑު ތިދަންނަވާ މިންވަރަށް އުފުލޭތަނެއް އެހާ ވަރަކަށް ނުފެނޭ." އިންޓަވިއުގައި ޑރ. މުޙައްމަދު މުޢިއްޒު ވިދާޅުވިއެވެ.  

މިދިޔަ 30 އަހަރު ދުވަހުގެ ތެރޭގައި ކަނޑުގެ ލޮނުގަނޑު އުފުލެމުން އައި ގޮތް ދައްކައިދޭ ގްރާފަކާ އެކު ސޯޝަލް މީޑިއާގައި ލިިއުއްވި ލިއުއްވުމެއްގައި މައުމޫނު ވިދާޅުވީ ދުނިޔެ ހޫނުވުމުގެ ސަބަބުން ކަނޑުގެ ލޮނުގަނޑު އުފުލެމުންދާ ދިއުމަކީ ސައިންޓިފިކް ހަގީގަތެއް ކަމަށެވެ.

"އެންމެންވެސް ސައެންޓިފިކް ޙަޤީޤަތްތައް ޤަބޫލުކުރަން ޖެހޭނެ. ދުނިޔެ ހޫނުވުމުގެ ސަބަބުން ކަނޑުގެ ލޮނުގަނޑު އުފުލެމުންދާ ދިޔުމަކީ އެފަދަ ޙަޤީޤަތެއް. ސެޓެލައިޓް މަޢުލޫމާތު ދައްކާ ގޮތުގައި މިވޭތުވެދިޔަ 30 އަހަރުގެ ތެރޭގައި ކަނޑުގެ ސަތަޙަ 3.4 މިލިމީޓަރ އުފުލިއްޖެ،" މައުމޫނު ވިދާޅުވިއެވެ.

ރާއްޖޭގެ ރައީސްކަމަށް އިންތިހާބުވެވަޑައިގެން ފަހުން މުއިއްޒު ބޭރުގެ މީޑިއާއަކަށް ދެއްވި ފުރަތަމަ އިންޓަވިއުގައި، މޫސުމީ ބަދަލުތަކުގެ ސަބަބުން ރާއްޖެ އަށް އެންމެ ބޮޑަށް ކޮށްފާނެ ކަމަށް ބެލެވޭ ގެއްލުން ނަފީކުރެއްވުމާ ގުޅިގެން ގިނަ ބައެއްގެ ފާޑުކިޔުން ވަނީ އަމާޒުވެފައެވެ. އަދި ތިމާވެށީގެ މައްސަލަތަކުގައި ބައިނަލްއަގްވާމީ މައިދާނުގައި ރާއްޖޭން ގެންގުޅޭ އަޑުހަރު ސިޔާސަތު އާ ސަރުކާރާ އެކު ބަދަލުވުމުގެ ކަންބޮޑުވުން ބައެއް މީހުން ފާޅުކުރިއެވެ.

މި ކަންބޮޑުވުންތަކާއި ގުޅިގެން އަލްޖަޒީރާ އިންޓަވިއުގައި އެމަނިކުފާނު ވާހަަކަފުޅު ދެއްކެވީ މޫސުމަށް އަންނަ ބަދަލުތައް ގަބޫލުނުކުރެއްވުމުގެ މާނައިގައި ނޫން ކަމަށް އިންތިގާލީ ތަރުޖަމާނު މުހައްމަދު ފިރުޒުލް އަބްދުﷲ ވަނީ ފަހުން ވިދާޅުވެފައެވެ.