1948 ވަނަ އަހަރުގެ ނަކްބާއަށްފަހު، ފަލަސްތީނުގެ މުސްލިމުންނާ ދެކޮޅަށް އިސްރާއީލުން ހިންގާ އެންމެ އަނިޔާވެރި ދުވަސްތައް ގުނަމުންދާއިރު، ފާއިތުވި 10 ދުވަހުގެ ތެރޭގައި އެކަނިވެސް ފަލަސްތީނުގެ 1 މިލިއަނަށް ވުރެން ގިނަ މީހުންގެ ގެދޮރު ގެއްލިފައިވެއެވެ. މީގެ އިތުރުން، އިސްރާއީލުން ހިންގަމުންދާ ހަނގުރާމައިގެ ޖަރީމާތަކުގެ ސަބަބުން، ފަލަސްތީނުގެ ރައްޔިތުން ތިބީ ބައިނަލްއަގްވާމީ މުޖުތަމައުގެ އެހީތެރިކަން އިންތިހާއަށް ބޭނުންވެފައެވެ.

އެހެންކަމުން، ފަލަސްތީނުގެ ރައްޔިތުންނަށް އެހީވުމަށް ފަންޑު ހޯދުމުގެގޮތުން، ދިވެހިރާއްޖޭގެ ގިނަ މީޑިއާތަކެއް ގުޅިގެން "އަހަރުމެން ފަލަސްތީނާއެކު" މި ނަމުގައި ދަނީ ޓެލެތޯނެއް ކުރިޔަށްގެންދަމުންނެވެ. މި ޓެލެތޯންގައި އާންމުންގެ ބޮޑު ތަރުހީބެއް މިހާތަނަށް ލިބިފައިވެއެވެ. މީގެ އިތުރުން މި ކެމްޕެއިންގައި އެސްޓީއޯ އަދި އެސްޓީއޯ ގްރޫޕްގައި ހިމެނޭ، މިފްކޯ، އެލައިޑް އިންޝުރަންސް، މޯލްޑިވްގޭސް، އެމްއެސްއެސް އަދި އެފްއެސްއެމްއިން ބައިވެރިވެ، އެ ކުންފުނި ތަކުގެ މުވައްޒަފުންނާއި އެސްޓީއޯގެ ހިއްސާދާރުންގެ ނަމުގައި އެއް މިލިއަން ދިވެހި ރުފިޔާ ހަދިޔާކޮށްފައިވެއެވެ. 

މި ހަރަކާތާއި ގުޅިގެން އެސްޓީއޯއިން ހާމަކޮށްފައިވާ ގޮތުގައި، ދިވެހީންނަކީ އަބަދުވެސް ފަލަސްތީނުގެ މިނިވަންކަމަށް ގޮވާލާ ބައެއްކަމާއި، މިކަމުގައި މުޅި އެސްޓީއޯ ގްރޫޕް އޮތީ ދިވެހި ރައްޔިތުންގެ ފަހަތުގައެވެ.

"ދިވެހިރާއްޖެ އިސްލާމްވީ ދުވަސް ފާހަގަކުރަމުންމިދާ ދަނޑިވަޅު ދިމާވެފައިވަނީ މުސްލިމުންގެ މުގައްދަސް އެއް ބިން ކަމަށްވާ ފަލަސްތީނުގެ ބިމުގައި އިސްރާއީލުން ފަލަސްތީނުގެ ރައްޔިތުންނާ ދެކޮޅަށް އިންސާނިއްޔަތާ ޚިލާފު އުދުވާނެއް ހިންގަމުންދާ ދަނޑިވަޅަކަށެވެ. ދިވެހިރާއްޖެއަކީ ފަލަސްތީނުގެ މިނިވަންކަމަށް އަބަދުވެސް ވަކާލާތުކުރާ ފަލަސްތީނުގެ ރައްޔިތުންނާއެކު އެއްބައެއްގެ ގޮތުގައި ތިބިބައެކެވެ. އިސްރާއީލުން މިހާރު ހިންގަމުންދާ އުދުވާނާ ގުޅިގެންވެސް ދިވެހިންވަނީ ފަލަސްތީނަށް އެހީވުމަށް މަސައްކަތް ފަށާފައެވެ. ރާއްޖޭގެ އެންމެ ބޮޑު އެއް ކުންފުނީގެ ހައިސިއްޔަތުން ދިވެހި ރައްޔިތުންގެ މި ހަރަކާތުގައި އެސްޓީއޯ ގްރޫޕްގައި ހިމެނޭ، އެސްޓީއޯ، މިފްކޯ، އެލައިޑް އިންޝުރަންސް، މޯލްޑިވްގޭސް،އެމްއެސްއެސް އަދި އެފްއެސްއެމްއިން އެ ރައްޔިތުންނާއެކު ތިބިކަން ޔަގީންކޮށް އަރުވަމެވެ"، އެސްޓީއޯއިން ހިއްސާކޮށްފައިވެއެވެ.