ޔަހޫދީ އިސްރާއީލުން ފަލަސްތީނަށް ދެމުންދާ ޙަމަލާތަކަކީ މުޅި އިސްލާމީ އުންމަތަށް ދެމުންދާ ޙަމަލާތަކެއްކަމަށާއި، މިނިސްޓަރ އޮފް ހޯމްއެފެއަރޒް ޢިމްރާން ޢަބްދުﷲ ވިދާޅުވެއްޖެއެވެ. ހޯމް މިނިސްޓަރ ޢިމްރާން މިހެން ވިދާޅުވީ، ރާއްޖެ އިސްލާމްވީ ދުވަހުގެ މުނާސަބަތުގައި ބޭއްވި ޖަލްސާ ޝަރަފްވެރިކޮށްދެއްވައި ވާހަކަފުޅުދައްކަވަމުންނެވެ.

މިނިސްޓަރ އިމްރާން ވިދާޅުވީ، ފަލަސްތީނަށް އިސްރާއިލުން ދެމުންދާ ހަމަލާތަަކަކީ މުޅި މުސްލިމް އުންމަތަށް ދެމުންދާ ހަމަލާތަކެއްކަމަށާއި، މުސްލިމު އުންމަތަށް އުފާވެރިކަން އަންނާނީ މުޅި މުސްލިމު އުންމަތް އެއްބައިވަންތަކަމާއެކު ތެދުވެގެން ކަމަށެވެ. 

އިސްލާމްދީނުގެ ހުރިހާވެސް ބާރަކީ އީމާންތެރިކަމާއެކު ދީނުގެ ހަމަތަކާ އުޞޫލުތައް ހިފެހެއްޓުންކަމަށް މިނިސްޓަރ ވިދާޅުވިއެވެ. އަދި އިސްލާމީ އުންމަތުގެ ގުޅުމަކީ ރަހިމުގެ ގުޅުމަށްވުރެ މާތް ގުޅުމެއްކަމަށްވެސް މިނިސްޓަރ ވިދާޅުވިއެވެ.

"އަބަދުވެސް ހަނދާން ކުރަންވީ މިނިވަން މުސްތަޤިއްލު ޤައުމެއްގެ ގޮތުގައި މިއަދާ ހަމައަށްވެސް ދެމިއޮތުމުގެ އަސްލަކީ، މާތްވެގެންވާ އިސްލާމްދީނުގެ މަތީގައި ސާބިތުވެ ތިބިކަން ދައްކުވައިދޭކަމެއް، ދިވެހީންނަށް ލިބިފައިވާ އެންމެ ބޮޑު ނިޢުމަތަކީ އިސްލާމް ދީން." ހޯމް މިނިސްޓަރ ޢިމްރާން ވިދާޅުވިއެވެ.

މިނިސްޓަރ ވިދާޅުވީ، ފަލަސްތީނުގެ ރައްޔިތުންގެ ހާލަތާ މެދު ކޮންމެ މުސްލިމަކުވެސް ވިސްނާ ފިކުރު ކުރަންޖެހޭކަމަށެވެ. އަދި އެ މުސްލިމުންނަށް ދެމުންދާ ލާއިންސާނީ އަނިޔާތައް ކުށްވެރި ކުރާކަމަށާ، އެއީ މުޅި މުސްލިމު އުއްމަތައް ދޭ ހަމަލާތަކެއްކަމަށް މިނިސްޓަރ ވިދާޅުވިއެވެ.