ޖާބިރުގެ މައްސަލަ މޯލްޑިވިއަނުން ފުލުހުންނަށް ހުށައަޅައިފި

މޯލްޑިވިއަންގެ އޮފިޝަލަކު ވިދާޅުވީ، މޯލްޑިވިއަންގެ އޮޕަރޭޝަންސްތަކުގައި މަސައްކަތް ކުރާ ހުރިހާ މުވައްޒަފުންގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އެޅުމުގައި އެކުންފުނިން ފަސްނުޖެހޭނެ ކަމަށެވެ. އަދި ކާށިދޫ ދާއިރާގެ މަޖިލިސް މެމްބަރު ޢަބުދުﷲ ޖާބިރު، މޯލްޑިވިއަންގެ ޕައިލެޓުންނާއި މެދު އަމަލުކުރި ގޮތުގެ މައްސަލަ ފުލުހުންނަށް މިހާރު ހުށައަޅާފައިވާ ކަމަށާއި، އެމައްސަލައިގައި މޯލްޑިވިއަނުން ދެން އަމަލުކުރާނެ ގޮތެއް ނިންމާނީ ފުލުހުންގެ ތަޙްޤީޤަށްފަހުގައި ސިވިލްއޭވިއޭޝަނާއި އެކުވެސް މަޝްވަރާކުރެވިގެން ކަމުގައި އެ އޮފިޝަލް ވިދާޅުވިއެވެ. އެހެން ނަމަވެސް މައްސަލައިގެ ތަޙްޤީޤު ހިނގަމުންދާ މި މަރުހަލާގައި މޯލްޑިވިއަންގެ ފްލައިޓްތަކުން ދަތުރުކުރުމުގެ ފުރުޞަތު ވަގުތީ ގޮތުން ޖާބިރަށް ނުދިނުމަށް ނިންމާފައިވާ ކަމުގައި އޭނާ ވިދާޅުވިއެވެ.