ރައްޔިތުންގެ މަޖިލީހުގެ މެމްބަރު ޢަބުދުﷲ ޖާބިރު، މޯލްޑިވިއަންގެ ސީޕްލޭން ޕައިލެޓުންނާއި ކްރޫއަށް، ހަޑިހުތުރު ބަހުން މުއާމަލާތުކޮށް، އަވަގުރާނަގޮވައި އިންޒާރުދީ ބިރުދެއްކި މައްސަލަ މޯލްޑިވިއަންގެ ފަރާތުން ފުލުހުންނަށް ހުށައަޅައިފިއެވެ.

މޯލްޑިވިއަންގެ އޮފިޝަލަކު ވިދާޅުވީ، މޯލްޑިވިއަންގެ އޮޕަރޭޝަންސްތަކުގައި މަސައްކަތް ކުރާ ހުރިހާ މުވައްޒަފުންގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އެޅުމުގައި އެކުންފުނިން ފަސްނުޖެހޭނެ ކަމަށެވެ. އަދި ކާށިދޫ ދާއިރާގެ މަޖިލިސް މެމްބަރު ޢަބުދުﷲ ޖާބިރު، މޯލްޑިވިއަންގެ ޕައިލެޓުންނާއި މެދު އަމަލުކުރި ގޮތުގެ މައްސަލަ ފުލުހުންނަށް މިހާރު ހުށައަޅާފައިވާ ކަމަށާއި، އެމައްސަލައިގައި މޯލްޑިވިއަނުން ދެން އަމަލުކުރާނެ ގޮތެއް ނިންމާނީ ފުލުހުންގެ ތަޙްޤީޤަށްފަހުގައި ސިވިލްއޭވިއޭޝަނާއި އެކުވެސް މަޝްވަރާކުރެވިގެން ކަމުގައި އެ އޮފިޝަލް ވިދާޅުވިއެވެ. އެހެން ނަމަވެސް މައްސަލައިގެ ތަޙްޤީޤު ހިނގަމުންދާ މި މަރުހަލާގައި މޯލްޑިވިއަންގެ ފްލައިޓްތަކުން ދަތުރުކުރުމުގެ ފުރުޞަތު ވަގުތީ ގޮތުން ޖާބިރަށް ނުދިނުމަށް ނިންމާފައިވާ ކަމުގައި އޭނާ ވިދާޅުވިއެވެ.

ކާށިދޫ ދާއިރާގެ މަޖިލިސް މެމްބަރު ޢަބުދުﷲ ޖާބިރު މޯލްޑިވިއަންގެ ސީޕްލޭން ޕްލެޓްފޯމެއްގެ މަތީގައި ހުންނަަވައިގެން، ޕައިލެޓުންނާއި ކްރޫންނަށް ވަރަށް ހަޑި ހުތުރުބަހުން އެއްޗެހި ގޮވައި އަވަގުރާނަ ގޮވާ މަންޒަރު ފެންނަ ވީޑިއޯއެއް ދަނީ ސޯޝަލް މީޑިއާގައި ދައުރުވަމުންނެވެ. އެ ވީޑިއޯއިން ފެންނަ ގޮތުގައި، ޖާބިރު ކޯފާވެގެން އުޅުއްވީ، ޕައިލެޓް ފްލައިޓް ދުއްވި ގޮތާއި މެދު ހިތްހަމަ ނުޖެހިގެންނާއި، އަދި، ފްލައިޓްގެ ކުރޫއަށް ޖާބިރަކީ ކާކުކަން ނޭނގިގެން ކަމަށް ޖާބިރުގެ ބައެއް ވާހަކަތަކުން ދޭހަވެއެވެ.