ފަލަސްޠީނުގެ އަޚުންނާއި އުޚުތުންނަށް ނަޞްރު ދެއްވައި، އަނިޔާވެރި ޔަހޫދީ ދައުލަތް ބަލިކުރެއްވުން އެދި، މާތްﷲއަށް ދުޢާކުރުމަށް ރާއްޖޭގެ ލޮބުވެތި ރައްޔިތުންނަށް މިއަދުގެ ހުކުރު ޚުޠުބާގައި ގޮވާލައިފިއެވެ.

މިއަދުގެ ހުކުރު ޚުޠުބާގައި ވަނީ، ފަލަސްޠީނުގެ މައްސަލައަށް ވަރަށް ތަފްޞީލީ ގޮތެއްގައި އަލިއަޅުވާ ލައްވާފައިއެވެ. މިގޮތުން ފަލަސްޠީނުގައިވާ މަސްޖިދުލް އަޤުޞާ އާއި މުސްލިމުންނާއި ހުރި ގުޅުމުގެ މައްޗަށް އަލިއަޅުވާލައި ޚުތުބާގައި ބުނެފައި ވަނީ، އެބިމަކީ މާތްﷲ ބަރަކާތްލައްވަވާފައިވާ ބިމެއް ކަމަށާއި، އެންމެ ގިނަ ނަބީންނާއި ރަސޫލުން އެބިމެއްގައި އުފަންވެވަޑައިގެންނެވި އަދި ދިރިއުޅުއްވި ބިންކަމަށެވެ. އަދި އެއީ، ކީރިތި ރަސޫލާ އިސްރާ ކުރެއްވެވުނު ބިންކަމަށާއި، އަދި އެކަލޭގެފާނު މިޢުރާޖުގެ ދަތުރުފުޅު ފެއްޓެވީވެސް އެބިމުންކަމުގައިވުމާއި، މުސްލިމުންގެ ފުރަތަމަ ޤިބުލައަކީ މަސްޖިދުލް އަޤުޞާކަމުގައިވުންވެސް ހުކުރު ޚުޠުބާގައި ފާހަގަކޮށްފައިވެއެވެ.

މީގެ އިތުރުން މުސްލިމުންގެ އަތުން އެބިމާއި އަޤުޞާ ފޭރިގަތުމަށްޓަކައި، ކުރަމުންދާ މަސައްކަތުގެ ތެރެއިން، މަސްޖިދުލް އަޤުޞާގެ ގޮތުގައި ޤުއްބަތުއް ސަޚްރާގެ ފޮޓޯ ފަތުރައިގެން ކުރަމުންދާ މަސައްކަތްތައްވެސް ޚުޠުބާގައި ވަނީ ފާހަގަކޮށްފައެވެ. އަދި ޔަހޫދީންގެ އަމާޒަކީ، ފަލަސްޠީނުގެ ބިމުން މުސްލިމުންގެ ވަސްވެސް ފޮހެލުންކަން މިއަދުގެ ޚުޠުބާގައި ވަނީ ފާހަގަކޮށްފައެވެ.

Advertisement

މިއަދުގެ ޚުޠުބާގައި ބުނެފައި ވަނީ، ޢަދުއްވުންނާއި ކުރެވުނު ހަނގުރާމަތަކުގައި، މުސްލިމުންނަށް ނަޞްރު ލިބިފައި ވަނީ، ހަނގުރާމަވެރިންގެ އަދަދާއި، ވަޞީލަތައް ގިނަވެގެން ނޫންކަމުގައެވެ. އަދި މުސްލިމުންނަށް ނަސްރާއި ފަތަޙަ ލިބިފައި ވަނީ، މާތްﷲއަށް ބަރޯސާވެ ވަކީލު ކުރުމާއިއެކު ސަބަބުތަކުގައި ހިފައިގެން ކުރިޔަށް ދިޔުމުންކަމުގައިވެސް ޚުޠުބާގައި ވަނީ ބުނެފައެވެ.

ހޮނިހިރު ދުވަހު، ފަލަސްޠީނުގެ މިނިވަންކަމަށްޓަކައި މަސައްކަތް ކުރަމުންދާ ޙަމާސް ޖަމާއަތުގެ މުޖާހިދުން އިޒްރާއީލަށް ދިން ކުއްލި ހަމަލާގެ ބަދަލު ހިފުމުގެ ގޮތުން އިޒްރޭލުން ދަނީ، ގައްޒާއަށް ބޮންއަޅައި މުޅި ގައްޒާއެކުގައި ސުންނާފަތި ކުރަމުންނެވެ.