ފަލަސްޠީނާއެކު ދިވެހިން ތިބިކަން ހާމަކުރުމަށް ބާއްވާ "ދިވެހިންގެ ބޮޑު އެއްވުން" މިއަދު ހަވީރު އޮންނާނެއެވެ. “ދިވެހިންގެ ބޮޑު އެއްވުން“ މި ހަރަކާތުގައި ރާއްޖޭގެ ގިނަ އަދަދެއްގެ ޖަމުޢިއްޔާ ޖަމާޢަތްތަކުން ވަނީ ބައިވެރިވެފައެވެ.

ފަލަސްޠީނުގައި މިވަގުތު ކާބޯތަކެއްޗާއި ތެޔޮ، އަދި ފެނާއި ކަރަންޓުވެސް ވަނީ ކަނޑާލާފައެވެ. އިންޓަނޭޝަނަލް އެއިޑް ކެންޕެއިނުން ބުނީ މިއީ ޤައުމީ ކެމްޕެއިނެއްކަމަށެވެ. މިވަގުތަކީ އިސްލާމީ އުންމަތުގެ ގޮތުގައި ދިވެހީން ތެދުވަންވީ ވަގުތުކަމަށެވެ.

އިންޓަނޭޝަނަލް އެއިޑް ކެމްޕެއިނާއި، އިސްރާ އެސޯސިއޭޝަނާއި، މިހަރަކާތުގައި މިވަގުތު ބައިވެރިވާ ޖަމްޢިއްޔާ ޖަމާއަތްތަކުގެ ފަރާތުން ވަނީ ދިވެހިރާއްޖޭގެ ހުރިހާ ޖަމްޢިއްޔާ ޖަމާއަތްތަކާއި، ހުރިހާ ސިޔާސީ ޕާޓީތަކާއި، ހުރިހާ ފަންތިއެއްގެ ހުރިހައި ގިންތިއެއްގެ ކުދި ބޮޑު އެންމެހާ ފަރާތްތަކުން މި އެއްވުމުގައި ބައިވެރިވުމަށް އެދިފައެވެ.

މި އެއްވުން އޮންނާނީ މިއަދު ހަވީރު 4 ޖަހާއިރު އާޓިފިޝިއަލް ބީޗުގައެވެ. އެއްވުމަށް ވަޑައިގަންނަވާއިރު ހުރިހައި ބޭފުޅުންވެސް ފަލަސްތީނުގެ ދިދައިގައި ހިމެނޭ ކުލަތައްކަމަށްވާ ފެހި، ރަތް، ހުދު އަދި ކަޅު ކުލައިގެ ހެދުމެއް ލުމަށް ވަނީ އެދިފައެވެ. ނުވަތަ ފަލަސްތީނުގެ ދިދައެއް ގެނެވިދާނެއެވެ. ދިދައެއް ނެތްނަމަ ފޮތިކޮޅެއްވެސް ގެނެވިދާނެއެވެ. އަދި އެއްވެސް އެއްޗެއް ނެތްނަމަވެސް އައިސް މި އެއްވުމުގައި ބައިވެރިވުމަކީ އެއްވުން އިންތިޒާމްކުރާ ފަރާތުގެ ވަރަށް ބޮޑު އެދުމެކެވެ. 

އިންޓަނޭޝަނަލް އެއިޑް ކެމްޕެއިން، އައިއޭސީން ބުނީ ޣައްޒާއަށް އެހީވުމަށް އެ ޖަމުޢިއްޔާއިން ފެށި ކެމްޕެއިނަށް މިހާރު ގާތްގަނޑަކަށް 3 މިލިއަން ދިވެހި ރުފިޔާ ލިބިފައިވާކަމަށެވެ. ފަލަސްޠީނުގެ ރައްޔިތުންނަށް އެހީތެރިވުމުގެ ގޮތުން ދިވެހި މީޑިއާތަކާއި، އައިއޭސީ ގުޅިގެން ޓެލެތޯނެއް ކުރިއަށް ގެންދިޔުމަށްވެސް ވަނީ ނިންމާފައެވެ. މި ޓެލެތޯން ކުރިއަށްގެންދިއުމަށް ހަމަޖެހިފައިވަނީ މިއަދުން ފެށިގެން މިމަހުގެ 17ވާ އަންގާރަ ދުވަހުގެ ނިޔަލަށެވެ.