ޕްލޭ އޮފުން ބަލިވެ މޭޖަރ ލީގަށް ކޮލިފައިނުވުމުގެ ސަބަބުން، އެމެރިކާގެ އިންޓަރ މިއާމީއަށް ކުޅެމުން އަންނަ އާޖެންޓީނާގެ ތަރި ލިއޮނެލް މެސީ އެޓީމު ދޫކޮށް ދާންބޭނުންނުވާކަމަށް ރިޕޯޓުތައް ބުނެފިއެވެ. ލޯނު އެއްބަސްވުމެއްގެ ދަށުން 6 މަހަށް މެސީ އެހެން ޓީމަކަށް ބަދަލުވާން އުޅޭ ކަމަށް އަޑުފެތުރުނީ، މޭޖަރ ލީގަށް ކޮލިފައި ނުވުމުގެ ސަބަބުން އޮކްޓޯބަރ 21 ވަނަ ދުވަހުން ފެށިގެން މިއަންނަ އަހަރުގެ ފެބްރުވަރީ މަހާއި ހިސާބަށް އިންޓަ މިއާމީއިން އެއްވެސް ވާދަވެރި މެޗެއް ނުކުޅޭނެތީއެވެ. 

އެންމެ ފުރަތަމަ އަޑު ފެތުރުނީ އެ މުއްދަތުގައި މެސީ އަނެއްކާވެސް ސްޕެއިންގެ ބާސެލޯނާއަށް ބަދަލުވާން އުޅުނު ވާހަކަތަކެވެ. އަދި އެއަށްފަހު ސައުދީގެ ޕްރޯ ލީގަށް ގޮސް، ކްރިސްޓިއާނޯ ރޮނާލްޑޯއާ އެކު މި ޖީލު ދުށް އެންމެ ވާދަވެރި ދެ ކުޅުންތެރިންގެ ކުރިމަތިލުންތައް އަލުން ފެންނަން އުޅޭކަމުގެ އަޑުތަކެވެ.

ނަމަވެސް ފުޓުބޯޅަ ޖާނަލިސްޓް، ފެބްރީޒިއޯ ރޮމާނޯ ހާމަކޮށްފައިވާ ގޮތުގައި، މެސީގެ ވިސްނުން މިހާރު ހުރީ ވޯލްޑް ކަޕަށް ކޮލިފައިވުމަށް ނޮވެމްބަރ ގައި އާޖެންޓީނާ ކުޅެންޖެހޭ ވާދަވެރި ދެ މެޗަށް ތައްޔާރުވުމަށެވެ. ނޮވެމްބަރުގައި ބްރެޒިލް އަދި އުރުގުއޭއާ ދެކޮޅަށް ވޯލްޑް ކަޕް ކޮލިފައިންގައި އާޖެންޓީނާ ކުޅޭނެއެވެ. މި މެޗުތައް އޮތީ ނޮވެމްބަރު 16 އަދި 21 ގައެވެ. މީގެ އިތުރުން ޗައިނާ އަދި ޖަޕާނުގައި އިންޓަމިއާމީއިން އެކުވެރިކަމުގެ މެޗުތަކެއް ކުޅޭނެކަމަށް ވެސް ރިޕޯޓުތައް ބުނެއެވެ. އެއީ ނޮވެމްބަރު މަހުގެ ކުރީކޮޅުއެވެ.  

މި ޕްލޭނާ އެއްގޮތަށް ގޮސް، ޑިސެމްބަރުގައި ޗުއްޓީ ނެގުމަށްފަހު، ޖެނުއަރީ 2024 އިން ފެށިގެން މިއާމީއާއެކު މެސީ ދެން ތައްޔާރުވާނީ އަންނަ ސީޒަނަށެވެ. 

މޭޖަރ ލީގަށް ކޮލިފައި ނުވާނެކަން އިންޓަރ މިއާމީއަށް ކަށަވަރުވީ މިދިޔަ ހޮނިހިރު ދުވަހު އެފް.ސީ. ސިންސިނާޓީއާ ކުޅުނު މެޗުން 1-0 އިން ބަލިވުމުންނެވެ. އެ މެޗުގެ 55 ވަނަ މިނެޓުގައި މެސީ ކުޅެއް ނިކުތީ، ފަޔަށް ލިބުނު އަނިޔާއަކާ ގުޅިގެން ޖެހިޖެހިގެން 5 މެޗު ނުކުޅެ ހުރުމަށްފަހުއެވެ. 

އިންޓަމިއާމީއަށް މިހާތަނަށް ކުޅުނު 13 މެޗުގައި މެސީވަނީ 12 ގޯލު ކާމިޔާބު ކޮށްދީފައެވެ. 

އިންޓަރ މިއާމީއަށް ބަދަލުވުމުގެ ކުރިން، ސައުދީ ލީގަށް ބަދަލުވުމަށް މެސީއަށް ހުށަހެޅި ހުށަހެޅުމަށް އޭނާވަނީ ފުރަގަސްދީފައެވެ. އޭރު ސައުދީ ލީގަށް ދިއުމަށް މެސީއަށް ހުށަހެޅީ 400$ މިލިއަން ޑޮލަރުގެ ހުޅަހެޅުމެކެވެ.