މިއަހަރުގެ ސައުތު އޭޝިއަން ޓްރެވެލް އެވޯޑްސް، ސާޓާގެ ގިނަ އެވޯޑްތަކެއް ރާއްޖެއަށް ލިބިއްޖެއެވެ. މީގެތެރޭގައި ވަކިވަކި ކުންފުނިތަކާއި ރިސޯޓްތަކުން ހާސިލްކޮށްފައިވާ އެވޯޑާއި ރާއްޖެއަށް ލިބިފައިވާ އެވޯޑްތައް ހިމެނެއެވެ. 

މިއަހަރުގެ އެވޯޑްގައި ރާއްޖޭގެ ޕްރޮޕަޓީތަކުން ވަނީ 31 އެވޯޑެއް ހާސިލްކޮށްފައެވެ. މީގެތެރޭގައި 14 ގޯލްޑް އެވޯޑާއި، 17 ސިލްވަރ އެވޯޑް ހިމެނެއެވެ.

ވިޒިޓާރސް ޗޮއިސް އެވޯޑްސްއިން ރާއްޖެއަށް ވަނީ ލީޑިން ބީޗް ޑެސްޓިނޭޝަންގެ އެވޯޑް ލިބިފައެވެ. މިއީ އާންމުންގެ ހިޔާލަށް ބަލައި ދެމުން އަންނަ އެވޯޑެކެވެ.

Advertisement

މިއަހަރުގެ އެވޯޑް ހަފްލާގައި ވަނީ ސައުތު އޭޝިއާ ސަރަހައްދުގައި ފަތުރުވެރިކަމުގެ ސިނާއަތުގައި ދިގު މުއްދަތަކަށް އަގުހުރި ޚިދުމަތްތަކެއް ކޮށްދެއްވާފައިވާ 4 ފަރާތަކަށް "ފޭސަސް އޮފް ސައުތު އޭޝިއާ" ގެ ނަމުގައި ވަނީ އެވޯޑް ދީފައެވެ. މީގެތެރެއިން ރާއްޖޭގެ 2 ބޭފުޅުންވެސް ހިމެނިވަޑައިގަންނަވައެވެ. އެއީ ރާއްޖެއަށް ފަތުރުވެރިކަން ތައާރަފްކުރެއްވި ބާނީއެއް ކަމަށްވާ އެމްޔޫ އުމަރު މަނިކާއި، ހޮޓެލްސް އެންޑް ކޮންސްޓްރަކްޝަންގެ ޗެއަރމަން މުޙައްމަދު އަލީ ޖަނާހްއެވެ.

މިއަހަރުގެ އެވޯޑް ހަފްލާ ބާއްވާފައިވަނީ އިންޑިއާގެ ބެންގަލޫރުގައި ހުންނަ ޝެރެޓަން ގްރޭންޑް ހޮޓެލްގައެވެ. ސާޓާ އެވޯޑަކީ ދެކުނު އޭޝިޔާ ސަރަޙައްދުގައި ފަތުރުވެރިކަމުގެ ދާއިރާގެ ދޭ އެންމެ ޝަރަފުވެރި އެއް އެވޯޑެވެ. މިއީ ސާޓާ އެވޯޑް ބާއްވާ 7 ވަނަ އަހަރެވެ.

މިއަހަރުގެ ސާޓާ އެވޯޑަށް ސައުތު އޭޝިއާގެ 6 ޤައުމަކުން ވާދަކުރިއެވެ. އެއީ އިންޑިއާ، ސްރީލަންކާ، ނޭޕާލް، ބޫޓާން، ބަނގްލަދޭސް އަދި ދިވެހިރާއްޖެއެވެ.