ހުޅުމާލެ 3ވަނަ ފިޔަވަހި ބިން ހިއްކުމުގެ މަސައްކަތުގެ ތެރެއިން ފުރަތަމަ މަރުހަލާގައި ހިއްކުމަށް ހަމަޖެހިފައިވާ ސަރަހައްދުގެ %70 ހިއްކާ ނިމިފައިވާކަމަށް އާރބަންކޯއިން ވިދާޅުވެއްޖެއެވެ. އާރބަންކޯއިން ބުނީ ހިއްކުމަށް ހަމަޖެހިފައިވާ 10 ހެކްޓަރު އަންނަ ހުކުރުދުވަހު ހިއްކާ ނިމޭނެކަމަށެވެ.

ބިން ހިއްކުމުގެ މަޝްރޫޢުގެ ދަށުން ހުޅުމާލެ ފަޅުން 63 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. ބިން ހިއްކުމުގެ މަސައްކަތް ކުރަމުން އަންނަނީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ ޕްރައިވެޓް ލިމިޓެޑް، ސީއެމްސީންނެވެ.

އާރބަންކޯއިން ވިދާޅުވީ ބިން ހިއްކުމުގެ މަސައްކަތް ކުރިއަށް ގެންދަނީ މަރުހަލާތަކަކަށް ބަހާލައިގެންކަމަށެވެ. އެގޮތުން ފުރަތަމަ މަރުހަލާގައި ހިއްކުމަށް ހަމަޖެހިފައިވަނީ 10 ހެކްޓަރުގެ ބިމެވެ. މުޅި މިމަޝްރޫޢުގެ މަސައްކަތް ހައެއްކަ ހަފުތާތެރޭގައި ނިންމާލުމަށް މަސައްކަތް ކުރަމުން އަންނަކަމަށް އާބަންކޯއިން ވަނީ ވިދާޅުވެފައެވެ.

އާރބަންކޯއިން މިހާރުވަނީ ތިންވަނަ ފިޔަވަހީގެ ދެވަނަ މަރުހަލާގެ ބިން ހިއްކަން ފެށުމަށްޓަކައި އެސަރަހައްދުގައި ހުރި އުޅަނދު ފަހަރު ނެގުމަށް އަންގަވާފައެވެ. އަދި އުޅަނދުތައް ނަގަންޖެހޭ ސަރަހައްދާ ނަގާ އުޅަނދުތައް ބޭއްވެނެ ސަރަހައްދު އެނގޭނެހެން ފާހަގަކޮށްފައިވާ ޗާޓެއް އެޗްޑީސީންވަނީ އާއްމުކުރައްވާފައެވެ.

ހުޅުމާލޭގައި މިހާރު ތަރައްޤީ ކުރެވެމުންދާ ފިޔަވަހިތަކެކޭ އެއްފަދައިން ތިންވަނަ ފިޔަވަހީގައިވެސް ގިނަ ޚިދުމަތްތަކާއި ވަސީލަތްތައް ތަރައްޤީ ކުރުމަށް ހަމަޖެހިފައިވާ ކަމަށް އާބަންކޯއިން ވިދާޅުވެއެވެ. އެގޮތުން މިފިޔަވަހިވެސް ތަރައްޤީކުރާނީ މަގުތަކާއި ބްރިޖްގެ އިތުރުން ޕާކްތަކާއި ކުޅިވަރާއި މުނިފޫހިފިލުވުމުގެ ހަރަކާތްތަކަށްވެސް ގިނަ ފުރުސަތުތައް ފަހިވާނެގޮތަށް ކަމަށް އާބަންކޯއިން ވިދާޅުވެފައެވެ.

ހުޅުމާލެއިން އަލަށް ހިއްކާ މި ބިމުގައިގައި ގެދޮރުވެރިކަމުގެ ބޭނުންތަކާއި، އިންޑްސްޓްރިއަލް ބޭނުންތަކާއި، މެރީނާގެ ބޭނުމަށް ބިން ބޭނުންކުރާނެ ކަމަށް އާބަންކޯއިން ވިދާޅުވެއެވެ.