އިންތިހާބީ ރައީސް ޑރ. މުހައްމަދު މުއިއްޒު އެންމެ ފުރަތަމަ ވަޑައިގަންނަވާނެ ރަށަކީ ތ. ގުރައިދޫ ކަން އިއުލާނުކުރައްވައިފިއެވެ.

އަމިއްލަ ޓީވީއަކަށް ދެއްވި އިންޓަވިއުއެއްގައި ޑރ.މުއިއްޒު ވިދާޅުވީ ރިޔާސީ އިންތިހާބުގެ ކެމްޕޭނުގައި ޒިޔާރަތް ކުރެއްވި ރަށްތަކުން އެދެމުން ދިޔައީ އެ ރަށްތަކަށް އަލުން ވަޑައިގަތުމަށް ކަމަށެވެ. އެހެންވެ، ޕާޓީގެ ލީޑަޝިޕުގައި މަޝްވަރާކޮށް ނިންމީ، އިންތިހާބަށް ފަހު އެންމެ ފުރަތަމަ ޒިޔާރަތް ކުރާނީ، އެންމެ މަތީ ޕަސެންޓޭޖަކުން ވޯޓު ލިބޭ ރަށަކަށް ކަމަށް އެ މަނިކުފާނު ވިދާޅުވިއެވެ.

ދެވަނަ ބުރުގައި ޑރ.މުއިއްޒަށް އެންމެ މަތީ ޕަސެންޓަކުން ވޯޓު ލިބިފައި ވަނީ ތ. ގުރައިދޫންނެވެ. އެހެންކަމުން އިންތިހާބުވެވަޑައިގަތުމަށްފަހު އެންމެ ފުރަތަމަ ވަޑައިގަންނަވާނީ ގުރައިދޫއަށްކަން މުއިއްޒު ވަނީ އިއުލާންކުރައްވާފައެވެ.

ތ. ގުރައިދޫގައި 2 ވޯޓު ފޮށި ހުރިއިރު 2 ފޮށިންވެސް ކުރި ހޯދެއްވީ މުއިއްޒުއެވެ. އެއީ %75.6 އާއި %72.4 ހޯދަވައިގެންނެވެ.

"އަޅުގަނޑުމެން މަސައްކަތް ފަށައިގަނެ ބައެއް ކަންކަން ސަރުކާރުގެ ތެރޭގައި ވެސް ހަމަޖައްސަން ހުންނާނެ. އެހެން ނަމަވެސް ވަރަށް އަވަހަށް، މާގިނަ ދުވަހެއް ނުވާނެ [ގުރައިދޫ އަށް ދާން]،" މުއިއްޒު ވިދާޅުވި އެވެ.

ރިޔާސީ އިންތިހާބުގައި މުއިއްޒު 54 ޕަސެންޓު ވޯޓު ހޯއްދެވިއިރު، ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 46 ޕަސެންޓެވެ.

މިހާރު ކުރެވެމުންދާ މަސައްކަތަކީ ވެރިކަން ބަދަލުވުމުގެ މަރުހަލާގައި ކުރަންޖެހޭ ކަންކަން ކުރުމުގެ މަސައްކަތެވެ.