ނެޓްފްލިކްސްއަށް ކޮންމެ ބުރާސްފަތި އަދި ހުކުރެއްގައި އައު ކޮންޓެންޓް އާދެއެވެ. އެކި ގައުމުތަކުގެ އެކި ވައްތަރުގެ ފިލްމު ތަކާއި ސީރީސްތަކެވެ. އެގޮތުން މިހާރު ސްޓްރީމް ކުރަމުންދާ ފަރާތްތަކަށް މިއޮތީ ރަނގަޅު ލިސްޓެކެވެ.

ކޫފިޔާ

ވިޝާލް ބަރްދަވާޖްއަކީ އިތުރު ތަޢާރަފަކަށް ބޭނުންނުވާވަރުގެ މޮޅު ފިލްމުތައް ގެނެސްދީފައިވާ ފަރާތެކެވެ. އޭގެތެރޭގައި 'އޯމްކާރާ'، 'ކަމީނޭ' އަދި 'ހައިދަރު' ހިމެނެއެވެ. މިފަހަރު ވިޝާލް މިގެނެސްދޭ ފިލްމަކީ ވެސް ތްރިލާ ފިލްމުތަކަށް ލޯބިކުރާ ފަރާތްތަކަށް ރަނގަޅު ފިލްމަކަށް ވާނެއެވެ. ލީޑް ރޯލުން ތާބޫ، ވަމިކާ އަދި އަލީ ފަޒަލް ފަދަ ތަރިން ފެނިގެންދާ މި ފިލްމަކީ ފެށިގެން ނިމެންދެން ވެސް ޝައުގުވެރި ފިލްމެކެވެ. 

ލުޕިން – ޕާޓް 3

ލުޕިން އަކީ މަޤްބޫލުކަން މިހާރުވެސް ހޯދާފައިވާ ފްރެންޗް ސީރީސްއެކެވެ. ބައްޕަގެ ބޮލުގައި ވައްކަމުގެ ތުހުމަތެއް އަޅުވައިގެން އެކަމުގެ ބަދަލު ހިފުމަށް އޭނާގެ ދަރި ނުކުމެ ކުރާ ކަންތައްތަކެއްގެ މައްޗަށް ބިނާކޮށްފައިވާ މި ސީރީސްއަކީ ފްރާންސްގެ ހިތްގައިމު މަންޒަރުތައް ދައްކުވައިދޭ ޝައުގުވެރި ސީރީޒްއެކެވެ. އަދި ޕާޓް 3 އިން އަނެއްކާވެސް އައު ކަންތައްތަކެއް ފެނިގެންދާނެއެވެ.

އާރް.ޑީ.އެކްސް

މިއީ ބަލާލަން އެއްވަނައިގެ މަލަޔާލަމް ފިލްމެކެވެ. މާޝިއަލް އަރޓްސްއަށް މޮޅު ތިން ބެއިންގެ ވާހަކަ ދައްކުވައިދޭ މި ފިލްމު ވެސް ބިނާވެފައިވަނީ ބަދަލު ހިފުމެއްގެ މައްޗަށެވެ. އަދި މީގެ އެކްޝަން ސީންތަކާއި ކްލައިމެކްސް އަށް ފުރިހަމަ ތަޢުރީފް ހައްގެވެ.

ބެކަމް

އިނގިރޭސިވިލާތުގެ މަޝްހޫރު ފުޓުބޯޅަ ކުޅުންތެރިޔާ ޑޭވިޑް ބެކަމްގެ ހަޔާތަށް ބިނާކޮށް ތައްޔާރުކޮށްފައިވާ މި ސީރީސްއަކީ ފުޓުބޯޅަ އަދި ހާއްސަކޮށް ބެކަމްގެ ފޭނުން ބަލާލަން ރަނގަޅު ޑޮކިއުމަންޓްރީއެކެވެ. މި ސީރީސްގައި ބެކަމްގެ ކެރިއަރގެ އެންމެ ކުރިން ފެށިގެން އަދާ ހަމައަށް ނޭނގޭ އެތައް ވާހަކަތަކެއް ހިއްސާކޮށްފައި ވެއެވެ.

ހުޝީ

ވިޖޭ ޑުވަރަކޮންޑަރ އަދި ސަމަންތާގެ ފޭނުންނަށް މިއީ ބަލާލަން ރަނގަޅު ލޯބީގެ ފިލްމެކެވެ. ފިލްމުގައި ދެމީހުންގެ ދެމެދުގައި ޖެހޭ މައްސަލަތައް ވަރަށް ރަނގަޅު ސޯޝަލް މެސެޖާއެކު ފޯރުކޮށްދީފައި ވެއެވެ. އަދި މިއީ އަމިއްލަ ޕާޓްނަރާއެކު ބަލާލަން ރަނގަޅު ފިލްމެކެވެ.