ކުރީގެ ރައީސް އަބްދުﷲ ޔާމީން ޖަލުގައި ހުންނެވިއިރު، އެމަނިކުފާނު ދޫކޮށްލުމަށް ކުރި މުޒާހަރާތަކުގައި އަމަލީ ގޮތުން ބައިވެރިވެވަޑައިގެންފައިވާނެ ކަމަށާއި އެ މުޒާހަރާތަކުގެ ތެރެއިން ދެ ފަހަރަށް ހައްޔަރު ވެސް ކޮށްފައިވާ ކަމަށް، ޕީއެންސީގެ ނައިބު ރައީސް، މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު މިއަދު ވިދާޅުވެއްޖެއެވެ. އާދަމް ޝަރީފް މިހެން ވިދާޅުވެފައިވަނީ ރޭ ޔާމީންގެ ގޭ ދޮށަށް ސަޕޯޓަރުން ޖަމާވުމުން އެމީހުންނާއި ވާހަކަދައްކަވަމުން ގައުމުގެ ހައްގުގައި އެންމެ ބޮޑު މަސައްކަތެއް ކުރެއްވީ އެ މަނިކުފާނު ކަމަށް ވިދާޅުވެ، އެ މަނިކުފާނު ޖަލުގައި ހުންނަވާއިރު، ޕާޓީގެ އިސް ބޭފުޅުންނަށް މަގުމަތީގައި އުޅެން ކެރިވަޑައިގަންނަވަން ވާނެ ކަމަށް ވިދާޅުވެފައިވާތީއެވެ.

އާދަމް ޝަރީފު ވިދާޅުވީ ޔާމީން ޖަލުގައިި ހުންނެވި އިރު، ޕީޕީއެމް-ޕީއެންސީން ބާއްްވަމުން އައި މުޒަހާރަތައް ރޭވުމާއި އެ މުޒާހަރާތަކުގައި އޭނާ އަމަލީ ގޮތުން ބައިވެރިވެވަޑައިގެންފައިވާނެ ކަމަށެވެ. އެގޮތުން، އޭނާ ވިދާޅުވީ އާއިލާ އާއި ދާއިރާއަށް ވަގުތު ނުދެއްވައި އޭރު ކުރެއްވި ހުރިހާ ކަމެއް ވެސް ކުރެއްވީ ޔާމީނާއި ޕާޓީގެ ހައްގުގައި ކަމަށެވެ.

"ޔެސް ސާ. ރައީސް ޔާމީން ޖަލުގައިި އޮންނެވި އިރު ޕީޕީއެމް-ޕީއެންސީން މުޒާހަރާ ރޭވުމާއި ސަޕޯޓާސް ކުރި ހުރިހާ މުޒާހަރާތަކުގައި އަމަލީ ގޮތުން ބައިވެރިވިން. ދެ ފަހަރަށް ފުލުހުން ބަންދުކުރި،" އާދަމް ޝަރީފް ވިދާޅުވިއެވެ.

ރޭ ސަޕޯޓަރުންނާ ވާހަކަފުޅު ދައްކަވަމުން ޔާމީން އެހެން ވިދާޅުވީ އެ މަނިކުފާނު މިނިވަންކުރުމަށް އިންތިހާބީ ރައީސް ޑރ. މުހައްމަދު މުއިއްޒުއަށް ފުރުސަތު ދެއްވުމަށާއި އެއްވުންތަކާއި މުޒާހަރާތައް މި ދަނޑިވަޅުގައި ނުބޭއްވުމަށް މުއިއްޒު އެދިވަޑައިގެންފައި ވަނިކޮށެވެ.

އޮންލައިން ނޫހަކަށް ދެއްވި އިންޓަވިއުއެއްގައި މުއިއްޒު ވިދާޅުވެފައިވަނީ އެ މަނިކުފާނު އެ ގޮތަށް އެދިވަޑައިގެންނެވި ސަބަބަކީ، މަގުމައްޗަށް މީހުން ނުކުމެ، އަނެއްކާވެސް ހަލަބޮލިކަމަކަށް ދާން ބޭނުން ނުވާތީކަމަށެވެ. އެމަނިކުފާނު ވެރިކަމަށް ވަޑައިގަތުމަށްފަހު ޔާމީން މިނިވަންކުރައްވާނެކަމަށް ވަނީ ވިދާޅުވެފައެވެ.