މާލެއިން ގޯތި ލިބުނު މީހުނަށް ރަޖިސްޓްރީ ހަވާލުކުރުން އަންގާރަ ދުވަހުން ފެށިގެން ކުރިއަށްދާނީ ކުރީގެ ސީއެޗްއެސްސީ ޢިމާރާތުގައިކަމަށް މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ އިން ވިދާޅުވެއްޖެއެވެ. މި މަސައްކަތް މިހާތަނަށް ކުރިއަށްގެންގޮސްފައިވަނީ ހުޅުމާލޭގައި ހުންނަ ސިންތެޓިކް ޓްރެކްގައެވެ.

ގޯތީގެ ރަޖިސްޓްރީ ހަވާލުކުރުމާއި، ބިން ކަނޑާ ހަވާލުކުރުމުގެ މަސައްކަތް މިނިސްޓްރީން ފެށީ އޮގަސްޓްމަހުގެ 27ވަނަ ދުވަހުއެވެ.  މިިނިސްޓްރީން މިހާރު މިވަނީ ރަޖިސްޓްރީގައި ސޮއިކުރުމުގެ މަސައްކަތް، މާލޭގައި ހުންނަ ކުރީގެ ސީއެޗްއެސްސީ އިމާރާތަށް ބަދަލުކުރުމަށް ނިންމަވާފައެވެ. އެގޮތުން އަންގާރަ ދުވަހުން ފަށައިގެން ދެން ގޯތީގެ ރަޖިސްޓްރީގައި ސޮއިކޮށް ދޫކުރާނީ، އެ ސެންޓަރުންނެވެ. މިނިސްޓްރީން ވިދާޅުވީ ގޯތި ލިބުނު މީހުންނަށް މިނިސްޓްރީން ގުޅައި، ރަޖިސްޓްރީގައި ސޮއިކުރަން ދާންވީ ގަޑިތައް އަންގަމުންދާނެކަމަށެވެ.

ސަރުކާރުގެ ބޯހިޔާވަހިކަމުގެ މަޝްރޫޢުގައި ހިމަނުއްވާފައިވާ، ބިންވެރިޔާ ސްކީމްގެދަށުން ޖުމްލަ 19,639 މާލެގެ ރައްޔިތުންނަށް ގޯތި ލިބެއެވެ. ޖޮއިން އެޕްލިކޭޝަންތައް ހިމެނޭހެން އެއީ 9,001 ގޯއްޗެވެ. ގޯތި ދޫކުރަނީ ހުޅުމާލެ، ގުޅީފަޅު އަދި ގިރާވަރު ފަޅުންނެވެ. 

Advertisement

ހުޅުމާލެއިން 1،351 ގޯތި، ގުޅިފަޅުން 2،218 ގޯތި އަދި ގިރާވަރު ފަޅުން 5،432 ގޯތި ދޫކުރެއެވެ. މި ގޯތި ތަކުގެ ތެރެއިން 1،250 އަކަފޫޓާއި 1،650 އަކަފޫޓާއި 2،050 އަކަފޫޓުގެ ގޯތިތައް ދެއްވާނީ ހުޅުމާލެއާއި، ގުޅިފަޅާއި ގިރާވަރު ފަޅުންނެއެވެ. އަދި 2،450 އަކަފޫޓުން ފެށިގެން 4،000 އަކަފޫޓާ ދެމެދުގެ ގޯތިތައް ދޫކުރައްވާނީ ހުޅުމާލެއާއި ގުޅިފަޅުންނެވެ.

ސަރުކާރުން ވިދާޅުވެފައިވަނީ ގޯތި ލިބުނު ހުރިހާ މީހުންނަށް ނޮވެމްބަރު 5ގެ ކުރިން ގޯތި ހަވާލުކޮށް ނިންމާނެކަމަށެވެ. މި މަސައްކަތަކީ ޒަމާނުއްސުރެ މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކޮށްދެެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހްގެ ސަރުކާރުން ފައްޓަވާފައިވާ މަސައްކަތެކެވެ.