ސަރުކާރު ހިންގާ ކޯލިޝަންގައި ހިމެނޭ، އަދި މި އަހަރުގެ ރިޔާސީ އިންތިހާބުގައިވެސް ވެރިކަން ކުރާ އެމްޑީޕީއާ ކޯލިޝަން ހަދާފައިވާ އަދާލަތު ޕާޓީއިން ސިޙުރުން ރައްކާތެރިވުމަށް ގޮވާލައްވައިފިއެވެ. އެ ޕާޓިން ފާހަގަ ކުރައްވާފައިވާ ގޮތުގައި، މިއީ ރިޔާސީ އިންތިހާބާ ގުޅިގެން އިދިކޮޅުން ސިޙުރު ހަދާކަމުގެ ވާހަކަ ދެކެވޭތީ، އެކަމުން ރައްކާތެރިވުމަށް ދިވެހި ރައްޔިތުންނަށް ދެއްވާ އިރުޝާދެއް ކަމަށެވެ.

އެ ޕާޓީން އާންމުކޮށްފައިވާ ވީޑިއޯގައި ޑރ. މުޙައްމަދު އިޔާޒް ވިދާޅުވީ، މި ދުވަސްވަރަކީ ސިޔާސީގޮތުން ވަރަށް ހަލަބޮލި، އެހާމެ ވާދަވެރި ދުވަސްވަރެއްކަމަށާއި، މި ދުވަސްވަރުގައި ވާދަވެރިން ކާމިޔާބު ހޯދުމުގެ ނިޔަތުގައި އިސްލާމްދީނުގައި ޙަރާމްކުރައްވާފައިވާ ސިޙުރުގެ އެހީތެރިކަން ހޯދުމަށް މަސައްކަތްކުރަމުން ގެންދާކަން ފާހަގަކުރެވިފައިވާކަމަށެވެ. މިކަމަށް އިޝާރާތް ކުރައްވައި، މި ޢަމަލުގެ ނުބައިކަން ވެސް ޑރ. އިޔާޒު އޮޅުންފިލުވާދެއްވިއެވެ.

"މިފަދަ ކަންކަމުގެ ސަބަބުން އެކަންކުރާ މީހުން އިސްލާމްދީނުން ބޭރުވެގެން ދޭ، ސަބަބަކީ ސިޙުރަކީ ކުފުރުގެ ޢަމަލެއް ކަމަށްވާތީވެ، އަދި ބޮޑުވެގެންވާ ހަތްފާފައިގެ ތެރޭގައިވެސް ހިމެނޭ ކަމަކަށްވާތީވެ."

ޑރ. އިޔާޒު އިތުރަށް ވިދާޅުވީ، ސިޙުރުވެރިޔަކަށް ސިޙުރުން ކުޑަ މިންވަރެއްވެސް ﷲ ތަޢާލާ އަށް ޝިރްކު ކުރުމަކާއި ނުލާ ނުހެދޭނެކަމަށާއި، ސިޙުރު ހަދާ މީހާ ކުފުރުވާނެ ކަމަށެވެ. އަދި މީގެ އިތުރުން ދުނިޔަވީ ނަޡަރަކުން ބަލައިފިނަމަ، އިންތިޚާބުގެ ނަޒާހާތްތެރިކަން ގެއްލިގެންދާފަދަ ކަމަކަށްވެސް މިކަން ވެގެންދާކަމަށާއި، މިފަދަ ކަންކަމުން ނަފްސު ސަލާމަތްކޮށް ރައްކާތެރި ކުރުމަށްޓަކައި ކޮންމެ ފަރުދަކުވެސް މަސައްކަތް ކުރުމަށް ޑރ. އިޔާޒު ގޮވާލެއްވިއެވެ.

ސިޙްރުން ރައްކާތެރިވުމަށް ކުރެވިދާނެ ކަންކަމަށް އަލިއަޅުވާލައްވައި ޑރ. އިޔާޒު ވިދާޅުވީ، އަޅުކަންތަކަށް ރައްކާތެރިވުމަށާއި، ހެނދުނާއި ހަވީރުގެ ޛިކްރުތަކަށް ރައްކާތެރިވުން މުހިންމު ކަމަށެވެ.

"އެގޮތުން ﷲ ފަރްޟުކުރެއްވި އެންމެހައި ކަންތަކަށް ފުރިހަމަ އަށް ރައްކާތެރިވެތިބެ، އަދި ނަހީކުރެއްވި އެންމެހައި ކަންކަމުން ދުރުހެލިވެ ތިބެ، ހެނދުނާއި ހަވީރުގެ ޛިކްރުތަކަށް ފުރިހަމަ އަށް ރައްކާތެރިވުމަކީ ވަރަށް މުހިއްމު ކަމެއް. މިރައްކާތެރިކަން އަޅުގަޑުމެން ހޯދައިގެން ތިބެއްޖެނަމަ، ކިތަންމެ މޮޅު ސިޙުރެއް ހެދިނަމަވެސް، ﷲ ގެ ރަޙްމަތާއި އެކު އަޅުގަޑުމެންނަށް ސަލާމަތާއި ރައްކާތެރިކަން ލިބިގެންދާނެ".

ޑރ. އިޔާޒުގެ ވާހަކަކޮޅު ނިންމާލައްވަމުން ވިދާޅުވީ، ފުރިހަމަ ޑިމޮކްރަޓިކް ނިޒާމެއް ޤާއިމްކުރަން ބޭނުންނަމަ މިނިވަން އިންޞާފުވެރި އިންތިޚާބަކަށް ޖާގަދެވެންޖެހޭކަމަށާއި، ސިޙުރާއި އެނޫންވެސް ޣައިރު ޝަރްޢީ އަދި ޣައިރު ޤާނޫނީ ގޮތްގޮތުން އިންތިޚާބުގެ ނަތީޖާ އާއި ކުޅެން މަސައްކަތްކުރުމަކީ، މުޅި މުޖްތަމަޢުގެ އަމަންއަމާން ކަމާއި ހަމަޖެހުމަށް ލޮޅުން އަރާފާނެ ކަމެއްކަމަށެވެ.