ކަނޑު އުޅަނދުތައް ދުއްވާ ފަރާތްތަކަށް ދޫކުރާ ލައިސަންސް ޑިޖިޓަލް ކުރުމަށް ނިންމާފައިވާކަމަށް ޓްރާންސްޕޯޓް މިނިސްޓްރީން ވިދާޅުވެއްޖެއެވެ. މިހާރު ކަނޑު އުޅަނދުތައް ދުއްވާ ފަރާތްތަކަށް ލައިސަންސްގެ ގޮތުގައި ދޫކުރަނީ ފޮތަކާއި ލެމިނޭޓްކޮށްފައިވާ ކާޑެކެވެ.

އެއްގަމު އުޅަދުފަހަރު ދުއްވަމުގެ ލައިސަންސްވެސް މިހާރު ވަނީ ޑިޖިޓަލައިޒްކޮށްފައެވެ. ޓްރާންސްޕޯޓް މިނިސްޓްރީން ވިދާޅުވީ، ކަނޑު އުޅަނދުފަހަރުގެ ލައިސަންސް ކުރިއަށް އޮތް 3 މަސްދުވަހުގެ ތެރޭގައި ލައިސަންސް ޓެސްޓްކުރުމުގެ މަސައްކަތް ފަށާނެކަމަށެވެ.

ކަނޑު އުޅަނދުތައް ދުއްވުމުގެ ލައިސަންސް ޑިޖިޓަލްވުމާއެކު މުޅި ލައިސަންސް ބަދަލުވެގެންދާނެކަމަށާ، އީ-ލައިސަންސް ދޭ ކެޓަގަރީތަކާއި ފީތަކަށްވެސް ބަދަލުތަކެއް އަންނާނެކަމަށް މިނިސްޓްރީން ވަނީ ބުނެފައެވެ. މިހާރު ދޫކުރާ ލައިސަންސް ހެއްދުމަށް 25 ރުފިޔާ ނެގިނަމަވެސް ޑިޖިޓަލް ލައިސަންސަކަށް ބަދަލުކުރުމުން ފީއެއްގެ ގޮތުގައި 250 ރުފިޔާ ނަގާނެއެވެ.  

މިހާރު ހުރި ކެޓަގަރީތަކުގެ އިތުރަށް ބާރު ސްޕީޑްގައި ދަތުރުކުރާ އުޅަނދުފަހަރަށް ވަކި ޚާއްސަ ކެޓަގަރީއެއް އޮންނާނެކަމަށް މިނިސްޓްރީން ވަނީ ބުނެފައެވެ. އަދި ދުވަސްވީ މީހުންނަށް ދޫކޮށްފައިވާ ލައިސަންސް އަޕްގްރޭޑް ކުރުމަށް އުނދަގުލެއް ނުވާނެކަމަށާއި އެކަމަށްވެސް ޚާއްސަ ކެޓަގަރީއެއް އޮންނާނެކަމަށް މިނިސްޓްރީން ވިދާޅުވެއެވެ.

މިނިސްޓްރީން ވިދާޅުވީ ކުރިން ވަކި ތިއަރީއަކާއި ޕްރެކްޓިކަލް ޓެސްޓެއް ހެދުމުން ނޫނީ ލައިސަންސް ލިބޭގޮތް އުވާލާ ނިއަމިކަމުގެ ކޯސްތައް ފުރިހަމަކުރުމާއި ދުއްވުމުގެ އިމްތިހާން ފުރިހަމަކުރުމުން ލައިސަންސްލިބޭ ގޮތްވެސް މިހާރު ހަމަޖައްސާފައިވާކަމަށެވެ. ޓްރާންސްޕޯޓް މިނިސްޓްރީން ވިދާޅުވީ ޑިޖިޓަލް ލައިސަންސް ތަޢާރަފްވުމާއެކު ރާއްޖޭގެ ހުރިހާ ރަށަކުން ލައިސަންސް ލިބިގެންދާނެ އިންތިޒާމް ހަމަޖެހިގެންދާނެކަމަށެވެ.