ފުލުހުންގެ ޕޮލްކޯ ފްލެޓްތައް ނިމި އެތަންތަން ހަވާލުކުރަން ތައްޔާރުވެއްޖެއެވެ. ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން ފުލުހުންނަށް ޚާއްސަކޮށް ތަރައްޤީކުރާ ޕޮލްކޯ ޕްލެޓްތައް ނުނިމިވަނީ ދިގުލައިގެން ގޮސްފައެވެ.

ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން ފުލުހުންނަށް ތަރައްޤީކޮށްދިނުމަށް ހަމަޖެހިފައިވަނީ 361 ފްލެޓެވެ. މި ފްލެޓްތަކުގެ މަސައްކަތް ފެށީ 2013 ވަނަ އަހަރުގައެވެ. ވޭތުވެދިޔަ 10 އަހަރު ތެރޭގައި މިމަސައްކަތް ނުނިމި ލަސްވެފައި އޮތުމަކީ ފުލުހުންނާއި ފުލުހުންގެ ޢާއިލާތަކުގެ ބޮޑު ކަންބޮޑުވުމެކެވެ. ގިނަ މައްސަލަތަކެއް ފެންމަތިވި މި ފްލެޓްތަކުގެ މަސައްކަތް މި ސަރުކާރުން އަމީން ކޮންސްޓްރަކްޝަނާއި ޙަވާލުކުރައްވައިގެންވަނީ ނިންމާފައެވެ.

ދިވެހި ފުލުހުންގެ ޚިދުމަތުން ވިދާޅުވީ މިހާރު މަސައްކަތް ނިމި ފްލެޓްތައް ޙަވާލުކުރުމަށް ކުރަންޖެހޭ އެންމެ ފަހުގެ މަސައްކަތްތައް ކުރަމުން އަންނަކަމަށެވެ. ފުލުހުންގެ ފްލެޓްތަކުގެ އަގުތަކަށް ހެޔޮ ބަދަލެއް ގެނެސްދެއްވާނެކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ އިއުލާންކުރައްވާފައެވެ. އެހެންކަމުން އެ ބަދަލާއެކު އެގްރިމަންޓްތައް އެކުލަވާލާ ފުލުހުންނަށް ފްލެޓް ޙަވާލުކުރުމަށް އެއްބަސްވުމުގައި ސޮއިކުރުމަށް ތައްޔާރުވަމުންދާކަމަށް ފުލުހުން ވަނީ ހާމަކޮށްފައެވެ.

ޕޮލްކޯ ފްލެޓް ލިބުނު ފަރާތްތަކުގެ ލިސްޓް ޢާއްމުކޮށް ބޮޑެތި ޢަދަދުތަކުން އެފަރާތްތަކުންވަނީ ފްލެޓަށް ފައިސާ ދައްކާފައެވެ. އެފަރާތްތަކުގެ ޝަކުވާ ތަކާއި ގުޅިގެން ރައީސުލްޖުމްހޫރިއްޔާވަނީ ފުލުހުންގެ 90 ވަނަ އަހަރީ ދުވަހުގެ ޖަލްސާގައި ފްލެޓްތަކުގެ އަގަށް ހެޔޮ ބަދަލެއް ގެނެސްދެއްވާނެކަމަށް ވިދާޅުވެފައެވެ. އަދި ގްރޭސް ޕީރިއަޑް މިއަހަރުގެ އޯގަސްޓް މަހުން ފެށިގެން 12 މަސްދުވަހަށް ހަމަޖެއްސެވުމަށްވެސް ރައީސުލްޖުމްހޫރިއްޔާ ވަނީ ނިންމަވާފައެވެ.

މި މަޝްރޫޢާއެކު އެމްއެންޑީއެފްގެ ފްލެޓްތަކުގެ މަސައްކަތްވެސް މިހާރުވަނީ ނިމިފައެވެ. އެފްލެޓްތައް މިހާރުވަނީ ފްލެޓް ލިބުނު ފަރާތްތަކަށް ޙަވާލުކޮށްފައެވެ. މި މަޝްރޫއުގެ ދަށުން ސިފައިންގެ ސިފްކޯ ހިޔާގެ 330 ފްލެޓް ވަނީ ތަރައްޤީކޮށްފައެވެ.