ޓްރެފިކް ގަވައިދާ ހިލާފުވެގެން ކޮށްފައިވާ ޖޫރިމަނާތައް ލުއިކޮށްދެއްވުމަށް ރައީސް ނިންމަވާފައިވާ ނިންމެވުމާ އެއްގޮތަށް އެ ޖޫރިމަނާތައް ލުއިކޮށްދިނުމަށް އެދުމުގެ ފުރުސަތު ހުޅުވާލައިފި އެވެ.

ރައީސް ވަނީ ޕާކިން ސްޓިކާގެ ޖޫރިމަނާގެ ތެރެއިން މިދިޔަ ފަސް އަހަރުގެ ތެރޭގައި ދައުލަތަށް ނުލިބި ހުރި ފައިސާ މައާފުކޮށްދެއްވުމަށް މިމަހުގެ 5 ވަނަ ދުވަހު ނިންމަވާފައެވެ.

ޕާކިން ސްޓިކާގެ ޖޫރިމަނާ ފިޔަވައި ޓްރެފިކް ގަވާއިދުތަކާ ހިލާފުވެގެން ކޮށްފައިވާ އެހެނިހެން ޓްރެފިކް ޖޫރިމަނާތައް ވެސް، އެ ޖޫރިމަނާއެއްގެ ބާވަތަށް ބަލައި ޓްރެއިނިން ޕްރޮގްރާމެއް ފުރިހަމަ ކުރުމުން މައާފުކޮށްދޭނެކަމަށް ސަރުކާރުން ވިދާޅުވެއެވެ.

ޓްރާންސްޕޯޓު މިނިސްޓްރީން ބުނީ 17 ނޮވެމްބަރު 2018 އިން ފެށިގެން މި މަހުގެ 5 ވަނަ ދުވަހުގެ ނިޔަލަށް ޓްރެފިކާ ގުޅިގެން ކޮށްފައިވާ ޖޫރިމަނާތައް މައާފުކޮށްދިނުމަށް އެދުމުގެ ފުރުސަތު މިހާރު ހުޅުވާލައިފައިވާކަމަށެވެ. މިނިސްޓްރީގެ އިއުލާނުގައި ބުނީ، ރައީސްގެ ނިންމެވުމާ އެއްގޮތަށް ޓްރެފިކް ޖޫރިމަނާ މައާފުކޮށްދިނުމަށް އެދުމުގެ ފުރުސަތު އަންނަ މަހުގެ 25އާ ހަމައަށް އޮންނާނެ ކަމަށެވެ. 

ރައީސްގެ ނިންމެވުމާ ގުޅިގެން މައާފުކޮށްދޭ ޓްރެފިކް ޖޫރިމަނާތަކަކީ:

- ލައިސަންސްއާ ގުޅޭ ޖޫރިމަނާތައް

- ގަވައިދާ ހިލާފަށް ދުއްވައިގެން ކޮށްފައިވާ ޖޫރިމަނާ

- އުޅަނދުގައި ހުންނަން ޖެހޭ ތަކެތި ހަމަނުވެ ދުއްވުން ނުވަތަ ބޭނުން ކުރުން

- ޓެކްސީއާ ގުޅޭ ގޮތުން ކޮށްފައިވާ ޖޫރިމަނާ

ޖޫރިމަނާ މައާފުކޮށްދިނުމަށް އެދެން ޖެހެނީ ސިމްސް ޕޯޓަލް މެދުވެރިކޮށެވެ. ޖޫރިިމަނާ މައާފުކޮށްދެނީ ޓްރެފިކާ ގުޅޭ ގަވާއިދުތަކާއި އިޖުތިމާއީ އެހެން މައްސަލަތަކަށް ހޭލުންތެރިކުރުމަށް ފުލުހުން ކުރިއަށް ގެންދާ 20 ގަޑިއިރުގެ ޕްރޮގްރާމެއް ފުރިހަމަކުރުމުންނެވެ.