އިންޑިއާ ސަރުކާރުގެ އެހީގެ ދަށުން ރާއްޖެއަށް ހަދިޔާ ކުރި 2 ހެލިކޮޕްޓަރު ވެސް ގެނައީ ކުރީގެ ސަރުކާރުތަކުން ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ. ޝާހިދު ވަނީ އެއީ މި ސަރުކާރުން ކުރިކަމެއް ނޫންކަމަށް ވިދާޅުވެފައެވެ. 

ޝާހިދު މިހެން ވިދާޅުވީ، ރޭ އެމްޑީޕީގެ ސޯސަން ޖަގަހައިގައި ބޭއްވި ޖަލްސާގައި ވާހަކަ ދައްކަވަމުންނެވެ.  ޝާހިދު ވަނީ އެފަދައިން ދޮގު ހަދައިގެން އިދިކޮޅުން ފިތުނަ ފަތުރަމުންދާ ކަމަށް ވިދާޅުވެ އެ ފިތުނައިގައި ނުޖެހުމަށް ރައްޔިތުންނަށް ގޮވާލައްވާފަ އެވެ.

"ދިވެހިރާއްޖެއަށް ފުރަތަމަ ހެލިކޮޕްޓަރެއް ގެނައީ 2011 ވަނަ އަހަރު އިންޑިއާއިން، އެ ހެލިކޮޕްޓަރު ގެންނެވީ ރައީސުލްޖުމްހުރިއްޔާ ކަމުގައި ރައީސް ނަޝީދު ހުންނެވިއިރު، ދެވަނަ ހެލިކޮޕްޓަރެއް ރާއްޖެ ގެނައީ 2016 ވަނަ އަހަރު، ރައީސުލްޖުމްހުރިއްޔާ ކަމުގައި ހުންނެވީ ރައީސް ޔާމީނު," ޝާހިދު ވިދާޅުވި އެވެ.

ޝާހިދު ވިދާޅުވީ ރައީސް އިބްރާހިމް މުހައްމަދު ސޯލިހު ވެރިކަމުގެ ހުވާ ކުރެއްވީ ވެސް އެ ދެ ހެލިކޮޕްޓަރުން ރާއްޖޭގައި ހިދުމަތް ދެމުން ދަނިކޮށް ކަމަށެވެ. އައްޑޫގައި އިންޑިއާ ސަރުކާރުން އަޅަމުންދާ ޕޮލިސް އެކަޑަމީއަކީ ވެސް ކުރީގެ ސަރުކާރަކުން އެއްބަސްވެގެން އަޅަމުންދާ އިމާރާތެއް ކަމަށް ޝާހިދު ވިދާޅުވި އެވެ.

"މި ދެ ހެލިކޮޕްޓަރު ގެނައުމާއި ރައީސުލްޖުމްހުރިއްޔާ އިބްރާހިމް މުހައްމަދު ސޯލިހުގެ ސަރުކާރަކާ އެއްވެސް ގުޅުމެއް ނެތް، އޭގަ އަޅާފައި އޮތް ސޮއެއް އަޅާފައިވަނީ ކުރީގެ ސަރުކާރުތަކުން،" އޭނާ ވިދާޅުވި އެވެ.

ރައްޔިތުންގެ ހިތުގައި ބިރުވެރިކަން އުފެއްދުމަށް އިދިކޮޅުން ފަތުރަމުންދިޔަ ނަފުރަތުގެ ދޮގު ކަމަށާއި ނަމަވެސް އެއާ ހިލާފަށް އެ މަރުކަޒުގައި އިންޑިއާ ސިފައިން ނެތްކަމަށް ވެސް ޝާހިދު ވިދާޅުވި އެވެ. ޝާހިދު ފާހަގަކުރެއްވީ އުތުރު ތިލަފަޅުގެ މަޝްރޫއަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ސޮއިކުރި އެއްބަސްވުމެއްގެ ދަށުން ކުރިއަށް ގެންދާ މަޝްރޫއެއް ކަމެވެ.