ހުޅުމާލެގައި "އާބަން ގްލައިޑް" ގެ ނަމުގައި އީ-ސްކޫޓަރ އާރބަންކޯއިން ތައާރަފްކޮށްފިއެވެ. އީ-ސްކޫޓަރ ނުވަތަ ކޮޅަށް ހުރެގެން ދުއްވާ ބެޓެރި ސައިކަލު މާދަމާއިން ފެށިގެން ދުއްވޭނެކަމަށް އާރބަންކޯއިން ބުނެއެވެ.

ތިމާވެއްޓާ ރައްޓެހި މާހައުލެއް ބިނާކޮށް މީހުން ޝައުގުވެރި ކުރުވަނިވި ކަމެއް ކުރުމުގެ ބޭނުމުގައި ހުޅުމާލެ ސެންޓްރަލް ޕާކުގައި ހަދާފައިވާ އާބަން ގްލައިޑް ސެންޓަރުގައި، އީ-ސްކޫޓަރ ލިބޭނެ އިންތިޒާމު ހަމަޖައްސައި އެތަނުގައި ވަނީ ހަތަރު އީ-ސްކޫޓަރ ބަހައްޓާފައެވެ. 

ތަރުހީބު ލިބޭވަރަކުން އިތުރު ޑޮކިންއެއް ބަހައްޓާ ސްކޫޓަރ އިތުރު ކުރާނެކަމަށްވެސް އެ ކުންފުނިން ވަނީ ބުނެފައެވެ. އީ-ސްކޫޓަތައް ޤާއިމްކޮށްފައިވަނީ އެކަމަށް ޚާއްސަކޮށްހަދާފައިވާ ޑޮކިން ސްޓޭޝަންތަކެއްގައެވެ. ބެޓެރިން ދުއްވާ މި އީ-ސްކޫޓަރުތައް ޗާޖުކުރާނީވެސް މި ޑޮކިން ސްޓޭޝަންތަކުންނެވެ.

ސްކޫޓަރުތައް ދުއްވުމަށް ވަކި ސަރަހައްދުތަކެއް މަގުތަކުގައި ވަނީ ކަނޑައަޅާފައެވެ. އެގޮތުން އީ-ސްކޫޓަރު ދުއްވާނެ ސަރަހައްދު އެނގޭނެހެން މަގުތަކުގައި ނޫކުލައިގެ ރޮގަކުން ފާހަގަކޮށްފައިވެއެވެ. އަދި އެ ސަރަހައްދުން ބޭރަށް ނިކުމެއްޖެނަމަ އެލާމް އަޅައި، ހުއްޓޭނެއެވެ.

ސްމާޓް ސިޓީއަކަށް ހުޅުމާލެ ހެދުމަށް ކުރާ މަސައްކަތުގެ ދަށުން އެޗްޑީސީން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ހުޅުމާލެ ސެންޓްރަލް ޕާކުގައި ސްމާޓް ބެންޗާ ސްމާޓް ޕޯލްތައް ވަނީ ބަހައްޓާފައެވެ. އިށީނުމަށް ހަދާފައިވާ ސްމާޓް ބެންޗްތަކުން ވަޔަލެސްކޮށް ފޯނުޗާޖުކުރެވޭނެއެވެ.  

މިސްކޫޓަރތައް ދުއްވަން ބޭނުންނާ ކޮންމެ މީހަކަށް ދުއްވޭނެކަމަށް އާރބަންކޯއިން ބުނެއެވެ. މި ސްކޫޓަރތައް ދުއްވަން ބޭނުންނަމަ އެންމެ ފުރަތަމަ ޖެހޭނީ "އާބަން ގްލައިޑް" އެޕްލިކޭޝަން އަޅައި ރަޖިސްޓްރީވާށެވެ.