މުޅި ދުނިޔޭގައި ފެތުރިފައިވާ ނުރައްކާތެރި ބޮޑެތި ވަބާތަކުގެ ތެރެއިން ނުރައްކާތެރިކަން ފިލުވައިލަން އެންމެ އުނދަގޫ އެއް ވަބާއަކީ ރިޝްވަތުގެ ވަބާކަމުގައި މިއަދުގެ ހުކުރު ޚުޠުބާގައި ފާހަގަކޮށްފިއެވެ. މިއީ ވަރަށް ސިއްރުން ކުރެވޭ އަދި މިހާރު މުޅި މުޖުތަމަޢުއަށް ޢާއްމުވެފައިވާ ކަމެއް ކަމަށާއި، ކޮންމެވެސް ގޮތަކުން ކޮންމެވެސް މިންވަރެއްގެ ރިޝްވަތަކާ ނުލައި އެއްވެސް ކަމެއް މިހާރު ނުކުރެވޭ ހިސާބަށް ގޮސްފައިވާކަމަށް ޚުޠުބާގައި ވެއެވެ.

ޢަދުލު އިންޞާފު ޤާއިމް ކުރުމަށް ހުންނަ އިދާރާތަކުގައި ވެސް ރިޝްވަތާއި ރިޝްވަތުގެ ޢަމަލުތައް އިތުރު ވެފައިވާއިރު، މިފަދަ ކަންކަމަކީ ޤައުމާއި މުޖުތަމަޢު ހަލާކުގެ ތެރެއަށް ވެއްޓިގެން ދިއުމަށް މެދުވެރިވާ ކަމެއްކަމަށާއި، މިފަދަ ކަންކަމުގެ ސަބަބުން ޤައުމުގެ ތަރައްޤީގެ ދުވެލި މަޑުޖެހި ކުރިއެރުމަށް ހުރަސްއެޅި، އަހަރެމެންގެ މި ކުޑަކުޑަ ރާއްޖެ ވެސް މި ނުރައްކާތެރި ވަބާގައި ޖެހިފައިވާކަން ޚުޠުބާގައި ފާހަގަކޮށްފައިވެއެވެ.

ރިޝްވަތަކީ ތިމާއަށް ޙައްޤު ނޫން ކަމެއް ނުވަތަ ޙައްޤު ނޫން އެއްޗެއް ނުވަތަ ޙައްޤު ނޫން މަންފާއެއް ލިބިގަތުމަށް، ނުވަތަ ތިމާ ކަމަކުން ބަރީއަވެ ސަލާމަތްވުމަށް ފައިސާ ނުވަތަ އެ ނޫންވެސް އެއްޗެއް، މީހަކަށް ނުވަތަ ބަޔަކަށް ހޯދައި ދިނުމެވެ. އެގޮތުން ރިޝްވަތު ދޭ މީހާ އާއި، ރިޝްވަތު އުފުލާ މީހާ އެބަހީ ރިޝްވަތު ދިނުމުގައި މެދުވެރިއަކަށްވާ މީހާ އާއި، ރިޝްވަތުގައި ހިފާ މީހާ އަށް މާތް ﷲ ވަނީ ލަޢުނަތް ލައްވާފައިކަމަށް ޚުޠުބާގައި ބުނެފައިވެއެވެ.

Advertisement

ރިޝްވަތަށް މަގުފަހިވާ ވަރަށް ގިނަ ސަބަބުތައް ޢިލްމުވެރިން ބަޔާންކުރައްވާފައި ވާކަމަށާއި، އޭގެތެރޭގައި އީމާންކަން ނެތުމާއި ރިޒުޤު ދެއްވަނީ މާތް ﷲ ކަން ޤަބޫލުނުކުރެވުން ހިމެނޭކަމަށް ޚުޠުބާގައި ބުނެފައިވެއެވެ. އަދި ތިމާއަށް ލިބޭ މިންވަރަށް ޝުކުރުވެރި ނުވުމާއި، ތިމާއަށްވުރެ ތަނަވަސް މީހުން އުޅޭ ގޮތަށް އުޅޭ ހިތްވެ، މިންވަރަށް އީމާންނުވެވި، މާ އަވަހަށް މުއްސަނދިވާން ބޭނުންވުން ވެސް މިކަންކަމުގެ ތެރޭގައި ހިމެނެއެވެ. މީހަކަށް ލިބޭ އާމްދަނީ މަދުވުމަކީ، އެ މީހަކު ރިޝްވަތު ހިފުމަށް، ނުވަތަ ދީނުގައި ޙަރާމް ކުރައްވާފައިވާ އެނޫންވެސް ކަންތަކަށް އަރައިގަތުމަށް، މަޖުބޫރުކުރުވާ ކަމެއް ނޫންކަމަށާއި މާތް ﷲ ގެ މިންވަރަށް އީމާންވެ، އެމީހެއްގެ ޢަމަލުތައް އިސްލާހުކޮށް އިއްޒަތުއް ނަފްސު ރައްކާތެރި ކުރުމާއެކު، އެމީހެއްގެ ރިޒުޤު ތަނަވަސް ކޮށްދެއްވުމަށް އެދި ﷲގެ ޙަޟްރަތުގައި ދެންނެވުމަށް ޚުޠުބާގައި ނަސޭހަތްތެރިވެފައި ވެއެވެ.