އިންޑިއާއިން 3 ބިލިއަން ރުފިޔާގެ ލޯނެއް ހޯދަން ސަރުކާރުން ހުށަހަޅާފައިވާކަމަށް ބުނެ ފަތުރަމުންދަނީ ހަޤީޤަތާއި ޚިލާފު ވާހަކަތަކެއްކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

ރާއްޖެއިން ބޮޑު ލޯނެއް ހޯދަން އިންޑިއާ ސަރުކާރުގައި އެދިފައިވާކަމަށާއި، އަދި އެކަމާއި ގުޅޭ ބައްދަލުވުންތައްވެސް ބާއްވާފައިވާކަމަށް ބުނެ ރާއްޖޭގެ މީޑިއާއަކުން ވަނީ ހަބަރު ފަތުރާފައެވެ. މިކަމާއި ގުޅިގެން މިނިސްޓަރ އަމީރު ވިދާޅުވީ ދިވެހި ސަރުކާރުން 3 ބިލިއަން ރުފިޔާގެ ލޯނެއްް ނަގަން އިންޑިއާއަށް ހުށަހަޅާފައިވާކަމަށް ފަތުރަމުންދަނީ ހަޤީޤަތާއި ހިލާފު ވާހަކަތަކެއްކަމަށެވެ. އަދި އެފަދަ އެއްވެސް މަޝްވަރާއެއް، އެއްވެސް ފަރާތަކާއެކު ކުރިއަށް ނުގެންދާނެކަމަށްވެސް އަމީރު ވިދާޅުވިއެވެ.

ރާއްޖޭގެ އިޤްތިޞާދާއި މާލީ ކަންކަމާއި ގުޅޭގޮތުން ހަޤީޤަތާއި ހިލާފު ވާހަކަތައް ނުފެތުރުމަށް ސަރުކާރުން މީގެކުރިން ވެސް ވަނީ އިލްތިމާސްކޮށްފައެވެ. މިފަދަ ހަޤީޤަތާއި ހިލާފު ވާހަކަތަކުގެ ސަބަބުން، ރާއްޖޭގެ އިޤްތިޞާދަށް ލިބެމުންދާ ކުރިއެެރުންތަކަށް އޭގެ ނުރަނގު އަސަރުކުރާނެކަން ތަޖުރިބާކާރުންވެސް ފާހަގަކުރައްވައެވެ. ކޯވިޑަށްފަހު މުޅި ދުނިޔޭންވެސް އެންމެ ބާރަށް ކުރިއަރަމުން އަންނަ އިޤްތިސާދުތަކުގެ ތެރޭގައި ރާއްޖެ ހިމެނެއެވެ. ދުނިޔޭގެ ބޮޑެތި މާލީ އިދާރާތަކުންވެސް ވަނީ މިކަން ފާހަގަކުރައްވާފައެވެ. 

އިޤްތިޞާދީ ކުރިއެރުންތަކާއެކު ދައުލަތުގެ އާމްދަނީ އިތުރުވަމުންދާއިރު، ރާއްޖެއިން ދައްކަންޖެހޭ ލޯނުތައް މިހާރުވެސް ޤަވާއިދުން ދައްކަމުންދާކަމަށާއި، އަދި ކުރިއަށް އޮތްތަނުގައިވެސް އެއްވެސް ދައްޗެއް ނެތި ދެއްކޭނެކަމުގެ ފުރިހަމަ ޔަގީންކަން ދިވެހި ސަރުކާރުން ދެއްވައެވެ.