ޓޫރިޒަމް މިނިސްޓްރީއިން ގަވާއިދަށް ގެނެސްފައިވާ ބަދަލަކާއި ގުޅިގެން މީޑީއާ އަދި މީސްމީޑިއާ ތަކުގައި ދައުރުވަމުންދާ "ރިސޯޓުތަކުގެ ކުލި ނުދައްކައިގެން ނަގާ ޖޫރިމަނާ މާފު ކުރުން" ޚަބަރު ބައެއް މީޑިއާ އަދި ފަރާތްތަކުން ގެނެސްދީފައިވަނީ އޮޅުން އަރާ ގޮތަށެވެ. މިގޮތުން މިނިސްޓަރ އޮފް ޓޫރިޒަމް ޑރ. އަބްދުالله މައުސޫމް ދައްކަވާފައިވާ ވާހަކައިގައި ކުލީގެ ޖޫރިމަނާއިން ބޮޑު އަދަދެއް މާފުވެގެން ގޮސްފައިވަނީ ރިސޯޓް ކުލީގެ ޖޫރިމަނާ ރީސްޓްރަކްޗަރ ކުރުމުގެ ތެރެއިންކަމަށް ވިދާޅުވެފައިވެއެވެ. 

މިޚަބަރު އެކިއެކި މީޑިއާތަކުން ގެނެސްދީފައިވާ ގޮތުން އާންމުންގެ ފަރާތްތަކަށް އޮޅުން އަރާފައިވާކަމާއި ޖޫރިމަނާގެ ގޮތުގައި ދައްކަންޖެހޭ ފައިސާ އެއްކޮށް މާފުވެފައިވާކަން ދޭހަވާ ގޮތަށް މާނަކުރެވިފައިވާކަން ފާހަގަކުރެވެއެވެ. އަދި މިކަމާއި ގުޅޭ ގޮތުން ރައީސް އޮފީހުގެ ތަރުޖަމާނު މިއުވާން މުޙައްމަދު ކޮށްފައިވާ ޓްވީޓެއްގައި ބުނެފައިވަނީ އެއްވެސް ރިސޯޓެއްގެ ކުލި މާފްކޮށްފައި ނުވާކަމަށެވެ. އެހެންނަމަވެސް ދައްކަންޖެހޭ ޖޫރިމަނާއަށް ބަދަލު އައިސްފަވަނީ އާދަޔާ ޚިލާފަށް ބޮޑުކޮށް އޮތް ޖޫރިމަނާ އަދަދުތަކަށް ގެނެސްފައިވާ ބަދަލަކާ ގުޅިގެންކަމަށެވެ.

މިއުވާން ބުނެފައިވާ ގޮތުގައި މީގެ ކުރީގައި ރިސޯޓު ކުލި ނުދެއްކުމާއި ގުޅިގެން އަރާ ޖޫރިމަނާ ހުރީ އަހަރަކަށް %180 ގެ ރޭޓުގަކަމާއި, މިއީ އިންސާނެއްގެ ބުއްދިއަށް ގަބޫލުކުރެވޭ ވަރަށްވުރެ ވެސް ބޮޑު އަދަދެއް ކަމަށެވެ. މިކަމާއި ގުޅޭ ގޮތުން މިސާލު ދައްކަމުން އޭނާ ބުނެފައިވަނީ ކުރީގެ ރޭޓުގައި (%180) 1 މިލިއަން ރުފިޔާގެ ކުލި ނުދައްކާ ރިސޯޓެއް ނަމަ އެފައިސާ އަނބުރާ ދައްކާ އިރު އެ އަދަދު ދެގުނަވެ އަހަރެއްގެ ތެރޭގައި 1.8 މިލިއަން ރުފިޔާ ޖޫރިމަނާގެ ގޮތުގައި ދައްކަންޖެހޭނަމަ ކުލީގެ 1 މިލިއަން ރުފިޔާއާ އެކު ޖުމުލަ 2.8 މިލިއަން ރުފިޔާ ދައްކަން ޖެހޭނެ ކަމަށެވެ. އަދި ބޭންކުތަކުން ނަގާ އިންޓްރެސްޓް ރޭޓުވެސް ހުންނަނީ އާންމުކޮށް މީގެ 36 ގުނަ އަށް ވުރެވެސް ކުޑަކޮށްކަން ވެސް އޭނާ ފާހަގަކުރެއްވިއެވެ.

Advertisement

އިތުރަށް ވާހަކަ ދައްކަމުން މިއުވާން ބުނެފައިވަނީ މި ޖޫރިމަނާ ރޭޓަކީ ރާއްޖެއަށް ޓެކްސް ނިޒާމް ތައާރަފް ކުރުމުގެ މާކުރިން ހަދާފައިވާ ރޭޓެއްކަމާއި ޓެކްސް ނިޒާމާއި އެކު އައި ބަދަލުތަކާއި އެކު ޖޫރިމަނާގެ ރޭޓަށް ގެނެވުނު ބަދަލަކީ ރިއަލިސްޓިކް ބަދަލެއްކަމަށާއި މިއީ ރާއްޖޭގެ ވިޔަފާރި ކުރުމުގެ ފަހިކަން އިތުރުކުރުމަށް އެޅުނު މުހިއްމު ފިޔަވަޅެއްކަމުގައެވެ. އަދި މިސަރުކާރުން 2020 ވަނަ އަހަރު ގެނެސްފައިވާ މިބަދަލު ތަންފީޒުކުރަން ފަށާފައިވަނީ ޖޫރިމަނާ %18 އަށް ކުޑަކޮށް ރިއަލިސްޓިކް ރޭޓެއްގައި ކަމަށާއި މިބަދަލާއި އެކު ކުރިން ނުދެއްކި ހުރި ޖޫރިމަނާ ފައިސާ އައު ރޭޓުގައި ދައްކާ ހަލާސްކުރުމަށް ރިސޯޓްތަކަށް ފުރުސަތު ދެވިފައިވާކަން މިއުވާން ފާހަގަކުރެއްވިއެވެ.