Advertisement
ޝިޔާމް ހުންނެވީ ރައީސްއާއިއެކު ގަދަކޮށް، މިކަން ކާމިޔާބުވާނެ: މައުރޫފް
އެމްޑީއޭގެ ރައީސް އަހުމަދު ސިޔާމް މުހައްމަދު ހުންނެވީ ރައީސް ސޯލިހާ އެކު ގަދަކޮށް ކަމަށް އެމްޑީއޭގެ ނައިބު ރައީސް އަލީ މައުރޫފު ރޭ ވިދާޅުވެއްޖެ އެވެ.
މި މަހުގެ 9ގައި ބޭއްވި އިންތިހާބުގެ ފުރަތަމަ ބުރަށް ފަހު، ރައީސްގެ ކޯލިޝަން ޕާޓްނަރު، ދ. މީދޫ ދާއިރާގެ މެމްބަރު އަހުމަދު ސިޔާމް ރައީސް ސޯލިހުގެ ކެމްޕޭނު ހަރަކާތްތަކުން ފެނިވަޑައިނުގަންނަވާތީ ސިޔާމް ރައީސާ ފެއަށް ޖެހިވަޑައިގަންނަވަން އުޅޭ ކަމަށް ވަނީ އަޑު ފެތުރިފަ އެވެ. ރޭ ސޯސަން ޖަގަހައިގައި ބޭއްވި ރައީސް ސޯލިހުގެ ކެމްޕޭނު ޖަލްސާގައި ވާހަކަ ދައްކަވަމުން މައުރޫފް ވިދާޅުވީ ދެ ވަނަ ބުރަށް ރައީސް ކުޅިބައި އަތުރާލައްވައި ކޯލިޝަނާ އެކު ނުކުންނަވާފައިވާ ކަމަށެވެ.
މައުރޫފް ވިދާޅުވީ، އެމްޑީޕީ އަކީ ރާއްޖެއަށް ޑިމޮކްރަސީ ގެނެސް އިންސާނީ ހައްގުތައް ކަށަވަރުކޮށްދިން ޕާޓީ ކަމަށާއި އެ ޕާޓީ އަކީ ކުރިއަށް އޮތް މުސްތަގުބަލުގައި ވެސް ރާއްޖެ އުފާވެރިކަން މަތީ ބާއްވާނެ ޕާޓީ ކަމަށެވެ. ކޯލިޝަން ނުރޫޅޭ ކަމަށާއި ކެމްޕޭނު ހަރަކާތްތައް ރަށްރަށުގައި ވެސް ވަރުގަދައަށް ޖައްސަން އެދިވަޑައިގަންނަވާ ކަމަށް މައުރޫފު ވިދާޅުވި އެވެ.
"އަޅުގަނޑުމެންގެ ލޮބުވެތި ރައީސް އަހުމަދު ސިޔާމް މުހައްމަދާއި ރައީސްއާ ގާތް ގުޅުމެއް އެބައޮތް،" މައުރޫފް ވިދާޅުވި އެވެ.
މައުރޫފް ވިދާޅުވީ، އަޒުމަށް ބަދަލު ނާންނަ ކަމަށާއި، އެމްޑީއޭގެ ގަދަ ފަހުލަވާނުން ރައީސާ އެކު އެބަ ތިބި ކަމަށެވެ. އަދި މި އިންތިހާބު ކާމިޔާބު ކުރާނީ ބޮޑު ތަފާތަކުން ކަމަށްވެސް ވަނީ ވިދާޅުވެފައެވެ.
ފުރަތަމަ ބުރުން ބަލިވީ ސަޕޯޓާއި ތާއީދުގެ އިތުރުން، ވޯޓު ދޭން ތިބި މީހުން މަދުވެގެންނެއް ނޫން ކަމަށާއި، ޓީމުތައް އަލުން އެކުލަވާލައި ގަދަކޮށް، އިންތިހާބު ކާމިޔާބު ކުރަން ޕްލޭން ހަދާފައިވާ ކަމަށްވެސް މައުރޫފް ވަނީ ވިދާޅުވެފައެވެ.
