ނޫސްވެރިކަމުގެ މިނިވަންކަމުގެ ޙައްޤާއި މަޢުލޫމާތު ހޯދައި ލިބިގަތުމުގެ ޙައްޤު، އެންމެ ފުޅާ ދާއިރާއެއްގައި ލިބިދެވުނީ މިދިޔަ ފަސް އަހަރުގެ ތެރޭގައި ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، 2023 ވަނަ އަހަރުގެ ބައިނަލްއަޤްވާމީ ޑިމޮކްރެސީ ދުވަހުގެ މުނާސަބަތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފޮނުއްވި ޚިޠާބުގައެވެ.

ރައީސުލްޖުމްހޫރިއްޔާގެ ޚިޠާބުގައި، ޚިޔާލު ފާޅުކުރުމާއި ނޫސްވެރިކަމުގެ މިނިވަންކަމަކީ، ޒަމާނީ ޑިމޮކްރެސީގެ އެންމެ އަސާސީ ރުކުންކަން ފާހަގަކުރައްވައި، ރާއްޖޭގައި، ނޫސްވެރިކަމާއި ޚިޔާލުފާޅުކުރުމުގެ މިނިވަންކަން ދެވިފައިވާ މިންވަރުގެ މައްޗަށް އަލިއަޅުއްވައި ލެއްވިއެވެ.

ރައީސުލްޖުމްހޫރިއްޔާ ވިދާޅުވީ، ނޫސްވެރިކަމާއި ޚިޔާލު ފާޅުކުރުމުގެ ޙައްޤުގެ ބޭނުން ހިފާ އިރު ޤަބޫލުކުރަންޖެހޭ ޙަޤީޤަތަކީ، އެއީ ޒިންމާތަކަކާއި ވާޖިބުތަކަކާ އެކުގައި ލިބިގެންވާ ޙައްޤުތަކެއްކަން ކަމަށެވެ.

ރާއްޖޭގައި ނޫސްވެރިކަމުގެ މިނިވަންކަމާއި ޚިޔާލުފާޅުކުރުމުގެ މިނިވަންކަމަށް އެންމެ ބޮޑު ހުރަހެއް ކުރިމަތި ކުރެއްވީ، އަނެއްކާވެސް އަލުން ވެރިކަމުގެ ބާރުތައް ހޯއްދެވުމަށް، ޕީއެންސީގެ ރިޔާސީ ކެންޑިޑޭޓްގެ ގޮތުގައި، ޑރ މުޙައްމަދު މުޢިއްޒު ނެރުައްވައިގެން، މަސައްކަތް ކުރައްވަމުން ގެންދަވާ ރައީސް ޔާމީނެވެ. ރައީސް ޔާމީނުގެ ވެރިކަމަކީ، ރާއްޖޭގައި ފުރަތަމަ ފަހަރަށް ނޫސްވެރިންނަށް ހަމަލާދީ މަރާލުން ފެށުނުވެސް ވެރިކަމެވެ. މިގޮތުން ނޫސްވެރިޔާ އަޙްމަދު ރިޟުވާނާއި، ބްލޮގަރު ޔާމީން ރަޝީދަށް ހަމަލާދީ މަރާލުމުގައި ސީދާ ރައީސް ޔާމީނުގެ ސަރުކާރުގެ އިސްފަރާތްތަކުގެ ބައިވެރިވުން އޮތްކަމަށް ވަނީ ތުހުމަތުތައް ކުރެވިފައެވެ.