ރިޔާސީ އިންތިޚާބުގެ ދެވަނަ ބުރުގެ ވޯޓުލުންވެސް ނުބާއްވަނީސް އިންތިޚާބު ކާމިޔާބުވެއްޖެކަމަށް ބަލައިގެން، ސަރުކާރުގެ މަޤާމުތަކުންނާއި އެސްއޯއީތަކުން ވަކިކުރާނެ މުވައްޒަފުންނާއި، ޖަލަށްލާނެ ފަރާތްތައް ކަނޑައަޅައި، ޕީޕީއެމް ޕީއެންސީއަށް ތާއީދުކުރާ ފަރާތްތަކުން ލިސްޓްތައް ހަދައި މީހުންނަށް އިންޒާރުދޭން ފަށައިފިއެވެ.

މިގޮތުން، ހއ. ބާރަށު ސްކޫލުގައި މަސައްކަތް ކުރާ މުވައްޒަފުންތަކެއް، އެސްކޫލުގެ ވަޒީފާތަކުން މީހުން ކެނޑުމަށާއި މަޤާމުތަކަށް ބަދަލު ގެންނަން ބޭނުންވާ ގޮތް، ޕީއެންސީގެ ރިޔާސީ ކެންޑިޑޭޓަށް ހުށައަޅައި ފޮނުވާފައިވާ ސިޓީއެއް ސޯޝަލް މީޑިއާގައި ވަނީ އާއްމުވެފައެވެ.  

އެސިޓީގައި ވަޒީފާއިން ކަނޑަށް ބޭނުންވާ މުވައްޒަފުންނާއި އަދި އެހެންތަންތަނަށް ވަޒީފާ ބަދަލުކުރުމަށް އެފަރާތްތަކުން ބޭނުންވާ މުވައްޒަފުންނާއި ގުޅޭ ގޮތުން ބުނެފައި ވަނީ، އެކަން ކުރަން ބޭނުންވަނީ އެ މުވައްޒަފުންނަކީ، ޕީޕީއެމް/ޕީއެންސީއަށް ތާއީދުކުރާ ބަޔަކަށް ނުވާތީ ކަމަށެވެ.

މީގެ އިތުރުންވެސް އިތުރު ލިސްޓްތައް ހަދައި، ޕީޕީއެމް/ޕީއެންސީއަށް ތާއީދުކުރާ ފަރާތްތަކުން އަންނަނީ، ޑރ. މުހައްމަދު މުއިއްޒުގެ ކެމްޕޭން ޓީމަށް ހުށައަޅަމުންނެވެ.

މީގެ އިތުރުން ސަރުކާރުގެ އެސްއޯއީތަކުގައި މަސައްކަތް ކުރާ މުވައްޒަފުންނަށް މަރުގެ އިންޒާރު ދިނުމާއި، އަދި ނޫސްވެރިންނާއި ނޫސްތަކުގެ މަސްޢޫލުވެރިންޖަަަލަށް ލާނެކަމަށް ބުނެވެސް ޕީއެންސީގެ ސަޕޯޓަރުން އަންނަނީ އިންޒާރުގެ މެސެޖްތައް ފޮނުވަމުންނެވެ.