މައްސަލަތަކެއް ފާހަގަކުރެވިފައިވާ ބޭހަކާއިމެދު ސަމާލުވުމަށް މޯލްޑިވްސް ފުޑް އެންޑް ޑްރަގް އޮރޯރިޓީ އެމްއެފްޑީއޭއިން އިލްތިމާސްކޮށްފިއެވެ. މި ބޭހަކީ "ޑެފިޓެލިއޯ"ގެ ބެޗްތަކެކެވެ. 

އެމްއެފްޑީއޭއިން ވިދާޅުވީ، "ޑެފިޓެލިއޯ"ގެ ބެޗްތަކެއް ތުރުކިޔޭ އަދި އިންޑިއާގައި ދައުރުވަމުންދާތީ، އެކަމަށް ސަމާލުވުމަށް އެދޭކަމަށެވެ. އެ ބޭހުގައި މައްސަލަތަކެއް ފާހަގަކުރެވިފައިވާކަމަށް އެމްއެފްޑީއޭއިން ވިދާޅުވިނަމަވެސް އެއީ ކޮން މައްސަލައެއްކަމެއް ހާމަކުރައްވާފައެއް ނުވެއެވެ.

މައްސަލަ ޖެހިފައިވާ މިބޭހުގެ ބެޗްތަކެއް މީގެކުރިންވެސްވަނީ، ޔޫއޭއީއާއި ކިރްގިސްތާނުން ފެނިގެން އެކަން ޑަބްލިއުއެޗްއޯއިން ޤައުމުތަކުގެ ސަމާލުކަމަށް ގެނެސްފައިވާކަމަށް އެމްއެފްޑީއޭއިން ވިދާޅުވެއެވެ.

އެމްއެފްޑީއޭއިން ވިދާޅުވީ މިބޭހަކީ ރާއްޖޭގައި ވިއްކުމުގެ ހުއްދަ ދީފައިވާ ބޭހުގެ ތެރޭގައި ހިމެނޭ ބޭހެއް ނޫންކަމަށެވެ. އެހެންނަމަވެސް ރާއްޖެއިން ބޭރުން ބޭސްފަރުވާކުރައްވާ ފަރާތްތަކުން ބޭސްފަރުގެ ބޭނުމަށް މިބޭސް ބޭނުންކުރާނަމަ އަދި ރާއްޖެއަށް އެތެރެކޮށް ބޭނުންކުރާނަމަވެސް ބޭހާއި މެދު ސަމާލުވުމަށް އެމްއެފްޑީއޭއިން އިލްތިމާސްކުރައްވައެވެ.

ރާއްޖެއަށް އެތެރެކުރާ ބޭސްތަކާއި މެދު ރައްކާތެރިކަމަށްޓަކައި އަޅާފައިވާ ފިޔަވަޅުތަކުގެ ދަށުން ރާއްޖޭގެ ޕޯޓުތަކުން އެތެރެކުރާ ބޭސްތައް ޚާއްސަ ސަމާލުކަމެއް ދީގެން ބަލައި ޗެކްކުރަމުންދާނެކަމަށް އެމްއެފްޑީއޭއިން ވިދާޅުވެއެވެ