މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް.) މުވައްޒަފުންގެ މުސާރައިގެ %50 ޔޫއެސް ޑޮލަރުން ދޭން އަނެއްކާވެސް އެ ކުންފުނިން ނިންމައިފިއެވެ. މިކަން އެ ކުންފުނީގެ މުވައްޒަފުންނަށް އަންގާފައިވަނީ މިއަދުއެވެ.

އެމްއޭސީއެލް އިން މުވައްޒަފުންނަށް އަންގާފައިވާގޮތުން, ކޮވިޑް-19 ގެ ހާލަތާއި ގުޅިގެން މުސާރައިގެ %50 ޑޮލަރުން ދެމުން ގެންދިޔަ ގެންދިޔުން މެދުކަނޑާލުމަށްފަހު ސެޕްޓެމްބަރ 2023 އިން ފެށިގެން އަލުން އަނބުރާ އެގޮތަށް ދިނުމަށް ވަނީ ނިންމާފައެވެ.

ކޮވިޑް-19 ގެ ހާލަތާއި ގުޅިގެން އެމްއޭސީއެލްގެ މުވައްޒިފުންނަށް މުސާރައިގެ ބައެއް ޑޮލަރުން ނުދޭން ނިންމީ 2020 ވަނަ އަހަރުގެ ޖޫން މަހުއެވެ. އެއަށްފަހު އެ ކުންފުނީގެ މުވައްޒިފުންނަށް މުސާރަދިނީ އެއްކޮށް ދިވެހި ރުފިޔާއިން ނެވެ. އަދި މިގޮތަށް އަމަލުކުރުމަށް ނިންމީ, އޭރުގެ ހާލަތުން ލިބެމުންދިޔަ މާލީ ދަތިކަމުން އަރައިގަތުމަށް ކުރަމުން ދިޔަ މަސައްކަތްތަކުގެ ތެރެއިންކަމަށް އޭރު އެ ކުންފުނިން ވަނީ ބުނެފައެވެ. 

މިކަމާއި ގުޅިގެން "ނޫން" އާ ވާހަކަ ދެއްކި އެމްއޭސީއެލްގެ މުވައްޒިފެއް ބުނީ, މިއީ ކުންފުނީގެ ވަރަށް އޯގާތެރި ނިންމުމެއް ކަމަށާއި, ކުންފުނީގެ މިހާރުގެ މެނޭޖުމެންޓާއި ސަރުކާރުން ވެސް އެ މުވައްޒަފުންގެ އަޑުއެހުމަކީ މުވައްޒިފުންގެ ފަރުދީ ތަނަވަސްކަން އިތުރު ކުރުމަށް ވެދިން ވަރަށް ބޮޑު އެހީތެރިކަމެއް ކަމަށެވެ.